വിദേശ ജോലി എങ്ങനെ കണ്ടെത്താം

പുതിയ ലോകത്ത് ജോലിക്ക് അതിരുകളില്ല. എന്നാൽ, നിയമവിധേയമായി, ചതിക്കുഴികളിൽ പെടാതെ എങ്ങനെ വിദേശരാജ്യങ്ങളിൽ തൊഴിൽ തേടാം?

- ഡോ. മുരളി തുമ്മാരുകുടി നീരജ ജാനകി

മുപ്പതു വർഷം മുൻപ് 1995 ലാണ് എനിക്ക് ആദ്യമായി വിദേശത്തു ജോലി ലഭിക്കുന്നത്. വിദേശജോലിക്കു ശ്രമിച്ചതിന്റെ അടിസ്ഥാനകാരണം സാമ്പത്തികം തന്നെയാണ്. 1993 ൽ ഐഐടിയിൽ നിന്നു ഡോക്റേറ്റ് ബിരുദം എടുത്തു കഴിഞ്ഞു മുംബൈയിലെ ഇന്ദിരാഗാന്ധി ഇൻസ്റ്റിറ്റ്യൂട്ട് ഓഫ് ഡെവലപ്മെന്റ് റിസർച്ചിൽ, റിസർച്ച് അസോഷ്യേറ്റ് ആയി ജോലിക്കു ചേർന്ന എന്റെ പ്രതിമാസ ശമ്പളം 6000 രൂപയായിരുന്നു. അന്നതു ചെറിയ തുകയല്ല. (ജവഹർലാൽ നെഹ്റു യൂ ണിവേഴ്സിറ്റിയിൽ അസിസ്റ്റന്റ് പ്രഫസർ ആയി ജോലി ലഭിച്ച എന്റെ സുഹൃത്തിന്റെ മാസശമ്പളം 4000 രൂപയിൽ താഴെയായിരുന്നു.

ജോലി രസകരമായിരുന്നു. പിൽക്കാലത്ത് പ്ലാനിങ് കമ്മീഷൻ അംഗവും പദ്മഭൂഷൺ ജേതാവുമായ കിരിത് പരീഖ് ആയിരുന്നു ഡയറക്ടർ. കേരള പ്ലാനിങ് ബോർഡിന്റെ ഇപ്പോഴത്തെ വൈസ് ചെയർമാൻ വി.കെ. രാമചന്ദ്രൻ അന്നു സഹപ്രവർത്തകനാണ്. എൻജിനീയറിങ്ങിലും മാനേജ്മെന്റിലും ഡോക്ടറേറ്റുള്ള അനവധി ചെറുപ്പക്കാർ സഹപ്രവർത്തകരായുണ്ട്. മുംബൈയിൽ ഫിലിം സിറ്റിക്കടുത്താണ് ഓഫിസ്. ക്യാംപസിൽ തന്നെ മൂന്നു കിടപ്പുമുറികളുള്ള ഫ്ലാറ്റും നൽകിയിട്ടുണ്ട്.

മാസം സാധാരണ ചെലവുകൾക്കായിത്തന്നെ മൂവായിരത്തിലധികം രൂപ വേണം, ഒരിക്കൽ നാട്ടിൽ വന്നു പോയാൽ ബാക്കിയുള്ള സമ്പാദ്യവും തീരും. മുന്നോട്ടു നോക്കുമ്പോൾ ഭാവിയിലെ ന്യായമായ ആവശ്യങ്ങൾക്കു ള്ള സമ്പാദ്യം അവിടുന്ന് ഉണ്ടാക്കാൻ സാധിക്കുമെന്നു തോന്നിയില്ല. ഉദാഹരണത്തിന് അന്ന് മുംബൈയുടെ പ്രാന്ത പ്രദേശങ്ങളിൽ ഒരു ഫ്ലാറ്റ് വാങ്ങണമെങ്കിൽ കുറഞ്ഞത് ഇരുപതു ലക്ഷം രൂപ കൊടുക്കണം, അതും പകുതി ബ്ലാക്കിൽ, ഈ ജോലിയിലിരുന്നു കൊണ്ട് പത്തു ലക്ഷം രൂപ ബ്ലാക്ക് മണിയും ബാങ്ക് ലോണിനു മാസം അയ്യായിരം രൂപയും എന്നുണ്ടാകും? അവിടെ നിന്നാണു വിദേശത്തു ജോലിക്കു പോകണമെന്ന തോന്നൽ ഉണ്ടാകുന്നത്.

ആദ്യ വിദേശജോലി

ബ്രൂണെയിൽ ഷെൽ എണ്ണക്കമ്പനിയിലാണ് ആദ്യത്തെ വിദേശജോലി ലഭിക്കുന്നത്. ഒരു മാസത്തെ ശമ്പളം അയ്യായിരം ബൂണെ ഡോളർ. ഏതാണ്ട് ഒരു ലക്ഷം രൂപയ്ക്കു മുകളിൽ. പിന്നെ രണ്ടാമതൊന്നു ചിന്തിച്ചി ല്ല. ഇന്നും ഇന്ത്യക്കു പുറത്തേക്കു ജോലിക്കായും വിദ്യാഭ്യാസത്തിനായും പോകുന്ന ബഹുഭൂരിപക്ഷത്തിന്റെയും പ്രധാന ലക്ഷ്യം മികച്ച സാമ്പത്തികം തന്നെയാണ്.

നമ്മൾ ഇന്ത്യയിൽ ചെയ്യുന്ന തൊഴിൽ വിദേശത്തു ചെയ്താൽ ആ രാജ്യത്തിന്റെ ആളോഹരി വരുമാനം നമ്മുടെ രാജ്യത്തിന്റേതിനേക്കാൾ മികച്ചതാണെങ്കിൽ സ്വാഭാവികമായും നമ്മുടെ വരുമാനം വർധിക്കും.