കുടുംബ ബജറ്റ് പുതുതുടക്കം

ചില മേക്ക് ഓവറുകളിലൂടെ ആരോഗ്യമുള്ള കുടുംബ ബജറ്റ് തയാറാക്കാം.

- വിജീഷ് ഗോപിനാഥ്

പനിവന്നാൽ മതി കുടുംബബജറ്റിന്റെ താളം തെറ്റാം. എന്നാൽ ചില മേക്ക് ഓവറുകളിലൂടെ ആരോഗ്യമുള്ള കുടുംബ ബജറ്റ് റെഡിയാക്കാം

എന്താണ് അവസ്ഥ ആദ്യം ചെയ്യേണ്ടത് സാമ്പത്തിക അവസ്ഥ എന്താണെന്നു തിരിച്ചറിയുകയാണ്. എത്ര സ്വത്തുണ്ട്. അതിന്റെ മൂല്യം എത്ര വീടിന്റെയും കാറിന്റെയും ഇപ്പോഴത്തെ വില, മ്യൂച്വൽ ഫണ്ട്, സ്ഥിര നിക്ഷേപം തുടങ്ങി എല്ലാത്തിനെക്കുറിച്ചും കണക്കെടുക്കുക.

ഇനി കടം മനസ്സിലാക്കുക. ലോൺ എത്ര തിരിച്ചടയ്ക്കാനുണ്ട് വിളിച്ചു കഴിഞ്ഞ ചിട്ടിയുടെ ബാക്കി. ഇത്തരം കടങ്ങളെല്ലാം കണക്കു കൂട്ടുമ്പോൾ നിങ്ങളുടെ ബാധ്യത എത്രയെന്ന് തിരിച്ചറിയാം. ബാധ്യത സ്വത്തിനെക്കാൾ കൂടുതലാണെങ്കിൽ ബജറ്റിൽ നിങ്ങൾ ഗൗരവമായ മാറ്റങ്ങൾ വരുത്തണം.

മാസ വരുമാനം അറിയുക : മാസം എത്ര തുക വരുമാനം ഉണ്ടെന്നു കണക്കാക്കുക. ശമ്പളവും വാടക ഇനത്തിലുള്ള വരുമാനവും ചെറിയ ബിസിനസുകളിൽ നിന്നുള്ളവയടക്കം എല്ലാം കൂടിയാണു കണക്കാക്കേണ്ടത്.

ചെലവിന്റെ റൂട്ട് മാപ് : ഏതുവഴിക്കു പണം ചെലവാകുന്നു എന്ന ധാരണ കൃത്യമായും വേണം. എല്ലാ ദിവസവും ചെലവാകുന്ന തുക ആറുമാസം ട്രാക്ക് ചെയ്യുക. എഴുതി വച്ച ശേഷം മാസാവസാനം പരിശോധിക്കണം.

ബജറ്റ് തയാറാക്കൽ : ഇതു രണ്ടും കണ്ടെത്തിക്കഴിഞ്ഞാൽ ബജറ്റ് തയാറാക്കാം. വരവു ചെലവുകൾ കൃത്യമായി ട്രാക്ക് ചെയ്ത ശേഷം ബജറ്റ് തയാറാക്കിയാൽ മാത്രമേ കൃത്യമായി പാലിക്കാനാവൂ.