വീട്ടിൽ കണ്ടു വളരണം ആരോഗ്യകരമായ ബന്ധങ്ങൾ

കുട്ടികളുടെ മുന്നിൽ വച്ചുള്ള വഴക്ക്, സ്നേഹപ്രകടനങ്ങൾ ഇവയെല്ലാം ഏതു പരിധി വരെയാകാം?

- സ്വാതി ജഗദീഷ് സെക്ഷ്വാലിറ്റി എജ്യൂക്കേറ്റർ

വീട്ടിൽ നിന്നാണ് കുട്ടി ബന്ധങ്ങളുടെ അടിസ്ഥാന തത്വങ്ങൾ പഠിക്കുന്നത്. സ്നേഹവും ബഹുമാനവും മാത്രമല്ല ആരോഗ്യകരമായ വഴക്കുകൾ, അഭിപ്രായവ്യത്യാസങ്ങൾ ഒക്കെ കുട്ടിക്കു പഠിക്കാനുള്ള ഇടങ്ങളായി വീടുകൾ മാറുന്നുണ്ട്. അഭിപ്രായവ്യത്യാസങ്ങളും ചെറിയ വഴക്കുകളും ഒക്കെ ആരോഗ്യകരമായ ബന്ധങ്ങളുടെ ഭാഗമാണെന്നു കുട്ടി അറിയുക തന്നെ വേണം. ഒരിക്കലും ശബ്ദമുയർത്താതെ ഇരിക്കുക, കുട്ടിയുടെ മുന്നിൽ ഒരു തരത്തിലുള്ള അഭിപ്രായവ്യത്യാസങ്ങളും കാണിക്കാതിരിക്കുക എന്നതും തെറ്റായ പ്രവണതയാണ്. അങ്ങനെ വളർന്നാൽ കുട്ടി സമൂഹത്തിലേക്കിറങ്ങുമ്പോൾ പ്രശ്നങ്ങൾക്കു മുന്നിൽ പകച്ചു പോകാൻ സാധ്യതയുണ്ട്.

അഭിപ്രായ വ്യത്യാസങ്ങൾ മാതാപിതാക്കൾ തമ്മിൽ ഉണ്ടാകാറുണ്ടെന്നും അത് ഏതൊരു ബന്ധത്തിലും ഉണ്ടാകുക സ്വാഭാവികമാണെന്നും കുട്ടി മനസ്സിലാക്കുന്നതാണ് ഉചിതം. പരസ്പരം പരിഹസിക്കാതെ, കുറ്റപ്പെടുത്താതെ, ശാരീരിക ഉപദ്രവങ്ങളില്ലാതെ അഭിപ്രായവ്യത്യാസം മുതിർന്നവർ പക്വതയോടെ കൈകാര്യം ചെയ്യുന്ന കാഴ്ചയാണു കുട്ടി കണ്ടു വളരേണ്ടത്.