നന്നായി കഴിക്കട്ടെ നല്ല ഭക്ഷണം

സ്കൂളിൽ പോകുന്ന കുട്ടികളുടെ ഭക്ഷണക്രമത്തെക്കുറിച്ചുള്ള മാതാപിതാക്കളുടെ സംശയങ്ങൾക്കു വിദഗ്ധ മറുപടി

- ചൈത്രാ ലക്ഷ്മി

മൂന്നു നേരവും പീത്സയും ബർഗറും ന്യൂഡിൽസും കിട്ടിയാൽ കുട്ടികൾക്കു സന്തോഷമാകും. ഇത്തരം ഭക്ഷണശീലങ്ങൾ വട്ടം ചുറ്റിക്കുന്നതു മാതാപിതാക്കളെയാണ്. കുട്ടികളുടെ ശാരീരികവും മാനസികവും ബുദ്ധിപരവുമായ വളർച്ചയ്ക്ക് ആവശ്യമായ പോഷകങ്ങൾ ഉറപ്പാക്കിയേ മതിയാകൂ. കുട്ടിക്ക് ഇഷ്ടമാകുന്ന രീതിയിൽ എങ്ങനെയാണ് ആരോഗ്യകരവും സ്വാദിഷ്ഠവുമായ ഭക്ഷണശീലങ്ങൾ ഉറപ്പാക്കേണ്ടത്. മാതാപിതാക്കളുടെ സംശയങ്ങൾക്കു വിദഗ്ധർ നൽകുന്ന മറുപടി അറിയാം.

മൈ ഫൂഡ് പ്ലേറ്റ്

 ഒരു പാത്രത്തിന്റെ പകുതി അളവിൽ പച്ചക്കറികളും പഴങ്ങളുമാണു വേണ്ടത്. കിഴങ്ങുകൾ, ചേന തുടങ്ങി സ്റ്റാർച് അടങ്ങിയവ പച്ചക്കറികളായി കണക്കാക്കേണ്ടതില്ല. കാൽഭാഗം കാർബോഹൈഡ്രേറ്റ് ആണു വേണ്ടത്. അരി, ഓട്സ്, ബാർലി തുടങ്ങിയ ധാന്യങ്ങളെല്ലാം ഈ വിഭാഗത്തിലുൾപ്പെടുത്താം. ചേമ്പ്, ചേന തുടങ്ങിയ സ്റ്റാർച് അടങ്ങിയ പച്ചക്കറികളും ഈ വിഭാഗത്തിലാണ് ഉൾപ്പെടുത്തേണ്ടത്.

ശേഷിക്കുന്ന കാൽഭാഗത്തു നിലവാരമുള്ള കൊഴുപ്പു കുറഞ്ഞ പ്രോട്ടീനുകളായ പയർവർഗങ്ങൾ, ചെറുധാന്യങ്ങൾ, പാൽ, പാൽ ഉൽപന്നങ്ങൾ, മീൻ, ചിക്കൻ തുടങ്ങിയവ ഉൾപ്പെടുത്താം.

ആട്ടിറച്ചി, ബീഫ് തുടങ്ങിയ ചുവന്ന മാംസം പ്രോട്ടീന്റെ നല്ല ഉറവിടമാണെങ്കിലും സാച്യുറേറ്റഡ് കൊഴുപ്പ് കൂടിയതിനാൽ അമിതമായി കഴിക്കുന്നത് ഒഴിവാക്കുന്നതാണു നല്ലത്.

വെജിറ്റേറിയൻ വിഭവങ്ങൾ കഴിക്കുന്നവർ പയർ - പരിപ്പുവർഗങ്ങൾ, പാൽ പാലുൽപന്നങ്ങൾ, ചെറുധാന്യങ്ങൾ ചെറുപയർ, മുതിര തുടങ്ങിയവയെല്ലാം ഉൾപ്പെടുത്തി പ്രോട്ടീൻ ഉറപ്പാക്കണം.

1 പ്രഭാതഭക്ഷണം കഴിക്കാതെയാണു സ്കൂളിൽ പോകുന്നത്. പോഷകക്കുറവു തടയാൻ എന്താണു ചെയ്യേണ്ടത്?

മിക്ക കുട്ടികൾക്കും ഉണർന്നയുടൻ ഭക്ഷണം കഴിക്കാൻ ബുദ്ധിമുട്ടാണ്. ഉറങ്ങാൻ വൈകും. ഉണരാനും. പിന്നെ, ഓട്ടപാച്ചിലാണ്. അതിനിടെ ഭക്ഷണം കഴിക്കാൻ മടി കാട്ടും. നേരത്തെ കിടത്തി ഉറക്കുകയും രാവിലെ നേരത്തെ എഴുന്നേൽപ്പിക്കുകയും ചെയ്യുക. ആ ചിട്ട ഭാവിജീവിതത്തിലും ഗുണം ചെയ്യും. നേരത്തേ ഉണരുന്നതു കൊണ്ടു തിടുക്കം ഒഴിവാക്കാം. വിശപ്പും ഉണ്ടാ കും. ശാന്തമായി ഭക്ഷണം കഴിച്ചു സ്കൂളിൽ പോകാൻ കഴിയും. കുട്ടികളോടു ചർച്ച ചെയ്ത് അവരുടെ ഇഷ്ടം കൂടി കണക്കിലെടുത്തു പ്രഭാതഭക്ഷണം തീരുമാനിക്കാം.

പോഷകാഹാരക്കുറവു പരിഹരിക്കാനായി പ്രഭാതഭക്ഷണം കാലറി കൂട്ടി ചെറിയ അളവിൽ നൽകാം.