இதயம் காக்கும் வாழ்க்கை முறைகள்!

மாறுபட்ட பிராண வாயுவின் விபரீதங்களும் - ஆக்ஸிடேட்டிவ் ஸ்ட்ரெஸ் (Oxidative Stress), அதிலிருந்து காப்பாற்றிக் கொள்ளும் வழி முறைகளும் - ஆன்ட்டி ஆக்ஸிடன்ட்ஸ் (Anti Oxidants)

- மருத்துவர் சொக்கலிங்கம், இருதய நோய் வல்லுநர்

மாறுபட்ட பிராண வாயுவின் விபரீதங்கள் (ஆக்சிடேட்டிவ் ஸ்ட்ரெஸ் Oxidative Stress):

உடம்பிலுள்ள எல்லா செல்களும், உயிர் வாழ்வதற்கு, பிராண வாயு (Oxygen - 02) மிக முக்கியம். இந்த செல்கள், பிராண வாயுவை பயன்படுத்தி, சக்தியைப் பெறும் பொழுது (Oxidation Cellular Metabolism), அதனால் வெளிப்படும் மாறுபட்ட பிராண வாயுவை, ஃப்ரீ ரேடிக்கல்ஸ் (Free radicals) என்று அழைக்கிறோம்.

அவைகள்:

* சூப்பர் ஆக்சைட் (Super Oxide -02)

* ஹைட்ராக்சில் (Hydroxyl -OH)

* ஹைட்ரஜன் பெர் ஆக்சைட் (Hydrogen peroxide -H2O2) இவை மூன்றும், அந்த செல்களையே அழிக்கும் சக்தியை உடையது.

அதனால் ஏற்படும் விபரீதங்கள்

* எல்லா இரத்தக் குழாய்களிலும், முக்கியமாக இதயம், மூளை இரத்தக் குழாய்களில் அடைப்பு ஏற்படுகிறது.

* கண்ணில் பொறை விழுதல் (Cataract)

* நரம்பு தொடர்பான நோய்கள் (Parkinson's) Disease, Schizophrenia)

* வயது முதிர்ச்சியின் மாற்றங்கள் (Ageing)

* முடி நரைத்தல் (Greying)

* தனக்குத்தானே நோயை ஏற்படுத்தும் தன்மை (Auto Immune Diseases-Rheumatoid Arthritis, Systemic Lupus Erythematosis - SLE)

* பல வகை புற்று நோய்கள்

ஆக்சிடேட்டிவ் ஸ்ட்ரெஸ்

இதற்கு ஓர் எடுத்துக்காட்டு: ஆப்பிள், உருளைக்கிழங்கு, கத்தரிக்காய் போன்றவைகளை நறுக்கி, சிறிது நேரம் வெளியே வைத்திருந்தால், அதன் வெண்மை நிறம் மாறி, பழுப்பு நிறமாக மாறுவதே ஆக்சிடேட்டிவ் ஸ்ட்ரெஸினால்தான். அவைகளின் தோலை சீவாமல் இருக்கும் வரை, இது நிகழாமல் பார்த்துக் கொள்ளும்.

பிராண வாயுவின், ஃப்ரீ ரேடிக்கல்ஸ் (Oxygen Free Radicals) அதிக அளவில் வெளிப்படும் சூழ்நிலைகள்

* மன அழுத்தம், கோபம், கவலை

* புகை பிடித்தல், மது அருந்துதல்

* மாசு அடைந்த காற்று (Air Pollution)

* உணவுப் பொருட்கள் கெடாமல் இருக்க பயன்படுத்தும் பொருட்கள் (Preservatives)

* சூரியக் குளியல்

* வேளாண்மைக்குப் பயன்படுத்தப்படும் பூச்சிக் கொல்லி மருந்துகள்

* சர்க்கரை நோய், இரத்தக் கொதிப்பு மற்றும் மாரடைப்பு ஏற்பட்ட நோயாளிகளிடம்.