ജീവിതത്തിന്റെ കലണ്ടർ

നടനും സംവിധായകനുമായ മഹേഷിന്റെ ജീവിതവഴികൾ...

- ഉമ ആനന്ദ്

വിദേശത്ത് ജനനം, ആലപ്പുഴയിൽ പഠനം. ഉദയാ സ്റ്റുഡിയോയുടെ പരിസരത്തെ താമസക്കാരനായതിനാൽ സ്വാഭാവികമായും ഉണ്ടായ സിനിമാ മോഹം. പകരക്കാരനായി അരങ്ങേറ്റം. തുടർന്നണിഞ്ഞത് സംവിധാനക്കുപ്പായം. ഒരിടവേളയ്ക്ക് ശേഷം വീണ്ടും അഭിനയം, നാടകീയമായി സിനിമയിലെത്തി നൂറ് ചിത്രങ്ങൾ പിന്നിട്ട മഹേഷ് എന്ന കലാകാരൻ സ്വന്തം കഥ പറയുന്നു.

“ഞാൻ ജനിച്ചത് വിദേശത്താണ്. ടാൻസാനിയയിൽ. അച്ഛൻ പദ്മനാഭൻ നായർ, അമ്മ പത്മകുമാരി. എനിക്ക് രണ്ട് സഹോദരിമാർ. മിനിയും മായയും. അച്ഛനും അച്ഛന്റെ സഹോദരങ്ങൾക്കും വിദേശത്തായിരുന്നു ജോലി. എനിക്ക് അഞ്ച് വയസ്സായപ്പോൾ ഞങ്ങൾ കേരളത്തിലെത്തി. ആലപ്പുഴയിൽ താമസമാക്കി. അതിനും കൃത്യമായ കാരണം ഉണ്ടായിരുന്നു. അച്ഛന് ഹൃദയ സംബന്ധമായ അസുഖമുണ്ടായിരുന്നു. തന്റെ മരണം എപ്പോഴായാലും അത് സ്വന്തം നാട്ടിലാകണമെന്ന് അച്ഛൻ ആഗ്രഹിച്ചു. അങ്ങനെ എന്റെ സ്കൂൾകാലഘട്ടം ആലപ്പുഴയിലായി. കവി വയലാർ രാമവർമ്മയുടേയും സത്യൻ സാറിന്റെയുമെല്ലാം മൃതദേഹങ്ങൾ വലിയ വിലാപയാത്രയായി പോകുന്നത് ശവക്കോട്ട പാലത്തിന്റെ അരിക് പറ്റി നിന്ന് കണ്ടിട്ടുണ്ട്. സ്കൂളിൽ പോകേണ്ടതും ആ വഴി തന്നെ. ഇരുനൂറ്റി അൻപത് സിനിമകൾ പൂർത്തിയാക്കിയ നസീർ സാറിന് ഉദയാ സ്റ്റുഡിയോ ആലപ്പുഴയിൽ നൽകിയ സ്വീകരണവും കാണാനിടയായി.