അന്ന എലീനർ റൂസ്വെൽറ്റ്

ഇതിഹാസത്തിലെ സ്ത്രീകൾ

- കണക്കൂർ ആർ. സുരേഷ്കുമാർ

സാമൂഹ്യ പ്രവർത്തകയും നയതന്ത്രജ്ഞയുമായിരുന്ന വനിത അന്ന എല്നർ റൂസ്വെൽറ്റ് അമേരിക്കയിൽ ഏറ്റവും കൂടുതൽ കാലം പ്രഥമ വനിതയായിരുന്ന വ്യക്തിയായിരുന്നു. അന്ന എലീനറുടെ ഭർത്താവ് ഫ്രാങ്ക്ളിൻ റൂസൽട്ട് 1933 മുതൽ 1945 വരെയുള്ള പന്ത്രണ്ടു വർഷക്കാലം അമേരിക്കയുടെ പ്രസിഡന്റായിരുന്നു. 1945 മുതൽ 1952 വരെ അന്ന എലീനർ ഐക്യരാഷ്ട്രസഭയിൽ അമേരിക്കയുടെ പ്രതിനിധിയുമായിരുന്നു. അവരുടെ മനുഷ്യാവകാശ പ്രവർത്തനങ്ങളെ പ്രകീർത്തിച്ചുകൊണ്ട് ഫസ്റ്റ് ലേഡി ഓഫ് ദ വേൾഡ്' എന്ന് അവരെ വിശേഷിപ്പിച്ചിരുന്നു.

1884-ൽ എലിയറ്റ് റൂസ്വെൽട്ടിന്റെയും അന്ന റബേക്കയുടെയും മകളായി ന്യൂയോർക്ക് പട്ടണത്തിലെ മൻഹാട്ടനിൽ അന്ന എലീനർ ജനിച്ചു. ഇളയ രണ്ടു സഹോദരങ്ങൾ കൂടാതെ പിതാവിന് കുടുംബത്തിലെ പരിചാരികയിൽ പിറന്ന ഒരു അർദ്ധസഹോദരനും എലീനർക്ക് ഉണ്ടായിരുന്നു. ചെറുപ്പത്തിൽത്തന്നെ മകളുടെ ഗൗരവപ്രകൃതി കാരണം അവളെ അമ്മ 'ഗ്രാനി' എന്ന് വിളിച്ചിരുന്നു. 1892-ൽ എലീനറുടെ അമ്മ ഡിഫ്തീരിയ ബാധമൂലം മരിച്ചു. വൈകാതെ ഒരു ഇളയ സഹോദരനും അസുഖബാധയിൽ മരിച്ചു. മദ്യപാനിയായ പിതാവ് മതിഭ്രമം കാരണം ജാലകത്തിലൂടെ പുറത്തേക്കു ചാടി പരിക്കേൽക്കുകയും തുടർന്ന് മരിക്കുകയുമുണ്ടായി.