സമാനതകളില്ലാത്ത നേതത്വശേഷി

പാദമുദ്ര

- സജിൽ ശ്രീധർ

വിവിധ ജനുസിലുളളതും വൈവിധ്യമാർന്ന പ്രത്യയശാസ്ത്ര സംഹിതകൾ ഉൾക്കൊളളുന്നതുമായ മുഖ്യമന്ത്രിമാരെയും പൊതുപ്രവർത്തകരെയും കണ്ട നാടാണ് കേരളം.

അതിൽ എവിടെയാണ് പിണറായി വിജയന്റെ സ്ഥാനം?

 ഇ.എം.എസിനെ പോലെ സി. അച്യുതമേനോനെ പോലെ ബൗദ്ധിക-ധൈഷണിക തലങ്ങളിൽ നിന്നു കൊണ്ട് രാഷ്ട്രീയത്തെ വ്യാഖ്യാനിക്കാൻ ശേഷിയുള്ള ഒരു നേതാവല്ല അദ്ദേഹം.

പ്രഭാഷണങ്ങളോ ലേഖനങ്ങളോ പഠനങ്ങളോ ചിന്തകളോ അല്ല അടിസ്ഥാനവർഗത്തിന്റെ നടുവിൽ നിന്നുകൊണ്ട് നടത്തിയ ഐതിഹാസികമായ പോരാട്ടങ്ങളും ആത്മാർത്ഥമായ പ്രവർത്തനങ്ങളുമാണ് അതീവസാധാരണമായ ജീവിതസാഹചര്യങ്ങളിൽ നിന്ന് രണ്ട് തവണ തുടർച്ചയായി അദ്ദേഹത്തെ കേരളത്തിന്റെ മുഖ്യമന്ത്രി കസേരയിൽ എത്തിച്ചത്.

ഒരേ സമയം നല്ല സംഘാടകനും നല്ല ഭരണാധികാരിയുമാണ് പിണറായി. വിവിധ തരക്കാരായ ജനവിഭാഗങ്ങളെ ഒരു പോലെ ചേർത്തുപിടിച്ച് മുന്നോട്ടു പോകാൻ കെൽപ്പുള്ള നേതാവ്.

ഹൃദയശുദ്ധിയുളള കോപം

ദേഷ്യം വന്നാൽ അത് തുറന്ന് പ്രകടിപ്പിക്കുന്ന നേതാവാണ് അദ്ദേഹം. മനഃ ശാസ്ത്ര തത്ത്വങ്ങളുടെ പിൻബലത്തിൽ വ്യാഖ്യാനിക്കുമ്പോൾ മനസിലുളളത് തുറന്ന് പ്രകടിപ്പിക്കുന്ന വ്യക്തിയാണ് അടിസ്ഥാനപരമായി നല്ല മനുഷ്യൻ. ഉളളിലെ രോഷം മറച്ചുപിടിച്ച് പുറമെ ചിരിച്ചു കാണിക്കുന്ന ശരാശരി രാഷ്ട്രീയക്കാരന്റെ കുതന്ത്രങ്ങളിൽ പിണറായി വിശ്വസിക്കുന്നില്ല. പ്രതിച്ഛായാ നിർമ്മിതിയെക്കുറിച്ചുളള ആശങ്ക അദ്ദേഹത്തെ അലട്ടുന്നില്ല. ഈ കാർക്കശ്യം ഉപരിപ്ലവബുദ്ധികൾ അദ്ദേഹത്തിന്റെ കുറവായി എടുത്തുകാട്ടുമ്പോൾ മേന്മയായി കാണാനാണ് ചിന്താശേഷിയുളളവർ ഇഷ്ടപ്പെടുന്നത്.

സി.പി.എമ്മിൽ നിന്ന് അകന്ന സിന്ധു ജോയി ഒരു അഭിമുഖത്തിൽ പറയുകയുണ്ടായി. താൻ പാർട്ടിയിലുണ്ടായിരുന്ന കാലത്ത് നന്മയുടെ അപ്പോസ്തലന്മാരെന്ന് പൊതുസമൂഹം കരുതുന്ന പലരും ധാർഷ്ട്യം കാണിച്ചപ്പോൾ ഒരു പിതാവിന്റെ സ്നേഹവും വാത്സല്യവും പ്രകടിപ്പിച്ച മനുഷ്യസ്നേഹിയായ നേതാവായിരുന്നു പിണറായി എന്ന്. വി ഡി. സതീശൻ അടക്കം എതിർധ്രുവങ്ങളിൽ നിൽക്കുന്നവർ പോലും സമാനമായ അഭിപ്രായമാണ് പ്രകടിപ്പിച്ചിട്ടുളളത്.

തമ്മിൽ തീരെ അടുപ്പമില്ലാതിരുന്ന കാലത്ത് ഒരു സുഹൃത്തിന്റെ  ആവശ്യം സതീശൻ ഫോണിൽ വിളിച്ച് പറയുമ്പോൾ താനൊരു മീറ്റിംഗിലാണന്നായിരുന്നു പിണറായിയുടെ മറുപടി.