இரட்டை இலை தாமரையாகிறதா?

அவர்கள் அப்படித்தான். கூட்டணி ஆட்சி என்பார்கள்.

- பரிதி

இடம்கொடுத்தால் கட்சிக்கு ரெண்டு எம்.எல். ஏக்களை தூக்கி தனி ஆட்சி அமைத்துக்கொள்வார்கள்.

கொஞ்சம் கொஞ்சமாக கூட்டணி கட்சியை சிதைத்து, வலுவில்லாமல் ஆக்கிவிடுவார்கள்.

அதனாலேயே இவர்களும் கலைந்து சென்றார்கள்.

மிரட்டி காதலிக்கும் முரட்டு காதலன் போல், பயமூட்டியே பக்கத்தில் கொண்டு வந்து விட்டார்கள். ஒரு காலத்தில் தமிழ்நாட்டில் அதிமுக கூட்டணி என்றே தங்களை அறிமுகப்படுத்திக் கொண்டார்கள். பின்பு மெல்ல, மெல்ல ஊடுருவி, தேசிய முன்னணி என்றனர்.

இப்போது பாஜக கூட்டணி என்றே நாமகரணம் சூட்டிவிட்டார்கள்.

அசைக்கமுடியாத திரையுலக ஜாம்பவான் எம்ஜிஆரால் தொடங்கப்பட்டு, அவரைப் போலவே மக்கள் செல்வாக்கு மிக்க ஜெயலலிதாவால் வளர்க்கப்பட்ட கட்சி, இப்போது மெலிந்து போய் காட்சியளிப்பதாகவே தெரிகிறது, அதற்கு காரணம் திடீரென அறிவிக்கப்பட்ட கூட்டணி என்று கருத்துரைக்கிறார்கள் அரசியல் விமர்சகர்கள்.

தமிழ்நாட்டை பொறுத்தவரை பாஜக கூட்டணி என்றாலே, சேரும் கட்சியை மலினமாக பார்க்கும் போக்கு மக்களிடம் இருக்கிறது. எனவே இப்போது அதனுடன் சேர்ந்த அதிமுகவின் நிலை என்னவாக இருக்கிறது என்பதை ஆராயவேண்டியுள்ளது.

அதிமுக இப்போது பாஜக ஆட்டுவிக்கும் பொம்மையாகிவிட்டதை வேதனையுடன் ஒப்புக்கொள்கின்றனர் அதிமுகவின் உண்மை தொண்டர்கள்.

அதற்கேற்ப 'எல்லாவற்றையும் டெல்லி முடிவு செய்யும். அதுபற்றி யாரும் எந்த கருத்தும் சொல்ல வேண்டாம்' என்று எடப்பாடி பழனிசாமி சொல்வதிலிருந்தே அதிமுகவின் கட்டுப்பாடு டெல்லி கையில் சென்று விட்டது உறுதியாகிறது.

அதிமுகவில் கொள்கை ரீதியாகவே பாஜகவை விமர்சித்து வந்த பல முன்னணித் தலைவர்கள் வாய்மூடி மௌனியாகி விட்டனர்.

அதோடு எடப்பாடி பழனிசாமியும் "எங்களுக்கு இருக்கும் ஒரே எதிரி திமுகதான். மற்ற கட்சிகள் எங்களுக்கு எதிரி கிடையாது.

தேர்தலில் வாக்குகள் சிந்தாமல் சிதறாமல் இருக்க வேண்டும்" என்று சொல்லத் தொடங்கிவிட்டார். 'மக்களை காப்போம் தமிழகத்தை மீட்போம்' என பச்சை பேருந்தில் பயணமும் கிளம்பிவிட்டார்.