ஊழலுக்கு வித்திடும் உழைப்பு சுரண்டல்!

அண்மையில் பேராசிரியை ஒருவர் சிகிச்சைக்கு வந்திருந்தார். அவருக்கு ஒரு அறுவை சிகிச்சை தேவைப்பட அதைக் குறித்து அவரிடம் விளக்கினேன். இதற்கு எவ்வளவு செலவாகும், எப்போது சமையல் செய்யலாம், எத்தனை நாள் விடுமுறை தேவைப்படும் என்று பல சந்தேகங்கள் கேட்டவர் மீண்டும் மீண்டும் சிகிச்சைக்காக ஆகும் தொகை பற்றியே கேட்டார்.

- டாக்டர் அகிலாண்ட பாரதி

அவருடன் வந்திருந்த உறவுக்காரப் பெண்மணி கிராமத்தைச் சேர்ந்தவர் போலும். "காலேஜ்ல வேலை பார்க்கீக.. எதுக்கு காசு பத்தி இவ்வளவு கவலைப்படுறீக?" என்றார் சட்டென்று.

கோடி ரூபாய் சம்பாதித்தாலும் ஒவ்வொருவருக்கும் ஒரு விதமான நிதி நிலை இருக்கும், நினைத்தவுடன் சிகிச்சைக்கென்று பணம் ஒதுக்கி விட முடியாது என்பதால், 'இவ்வளவு பணம் தானே! செலவழிக்கலாம் உங்களால்' என்று எப்போதும் நான் கூறுவதில்லை.

"கவர்ன்மென்ட் காலேஜ் லெக்சரரா நீங்க? இன்ஷுரன்ஸ் கார்டு இருக்கா.. அதுல இது கவர் ஆகும்" என்று நான் சொல்ல, 'கவர்ன்மென்ட் காலேஜ் தான். ஆனால் நான் டெம்ப்ரவரி ஸ்டாஃப் மேடம். பதினஞ்சு வருஷமா இதோ இப்ப பெர்மனன்ட் பண்ணிடுவாங்க, அப்ப பெர்மனன்ட் பண்ணிடுவாங்கன்னு எதிர்பார்த்துக்கிட்டே இருக்கேன், ஒன்னும் நடக்க மாட்டேங்குது. இப்ப மூணு மாசமா சேலரியும் போடலை" என்றார்.