ജപ്തിചെയ്യപ്പെട്ട ജീവിതങ്ങൾ

ബാങ്കിന്റെ ജപ്തി നോട്ടീസ് പൊന്നുമോളുടെ ജീവനെടുത്തു. സങ്കടക്കടലിൽ ഒരച്ഛനും അമ്മയും

- സുജിത്ത്

അവളായിരുന്നു ഞങ്ങൾക്കെല്ലാം... ഞങ്ങൾ ജീവിച്ചതു തന്നെ അവൾക്കു വേണ്ടിയായിരുന്നു. എല്ലാ പ്രതീക്ഷയും അവളിലായിരുന്നു. ആകെയുള്ള മകൾ... ഞങ്ങൾക്ക് തണലാകേണ്ടവൾ... പക്ഷേ, പ്രതീക്ഷകളും സ്വപ്നങ്ങളും ആ ഒരു ബോർഡിൽ ഒതുങ്ങി...'' അജിക്ക് വാക്കുകൾ ഇടറുന്നു. കൊല്ലം ശൂരനാട് തെക്ക് തൃക്കുന്നപ്പുഴ വടക്ക് അജിമന്ദിരത്തിൽ അജിയുടെയും ശാലിനിയുടെയും ഏകമകളായിരുന്നു അഭിരാമി. വീടിന്റെ വെളിച്ചമായിരുന്ന പത്താൻപതുകാരി, വായ്പാ കുടിശ്ശികയെ തുടർന്ന് ബാങ്ക്, വീടിനു മുന്നിൽ ജപ്തിബോർഡ് സ്ഥാപിച്ച വിഷമത്തിൽ ജീവനൊടുക്കി. ആ വേർപാടിന്റെ ആഘാതത്തിൽനിന്ന് അഭിരാമിയുടെ കുടുംബം മോചിതരായിട്ടില്ല. മാതാപിതാക്കൾക്കും മുത്തശ്ശനും മുത്തശ്ശിക്കും ഒപ്പം സന്തോഷത്തോടെ കഴിഞ്ഞവീടിന്റെ പിന്നിൽ അവളുടെ കുഴിമാടമുണ്ട്. ഏതുമഴയും പെയ്തുതോരുമെങ്കിലും ഇവരുടെ കണ്ണീർ പെരുമഴ തോരുന്നില്ല.

അറ്റുപോയ സ്വപ്നങ്ങൾ

“നല്ല പക്വതയും വിവേകവുമുള്ള മോളായിരുന്നു. എല്ലാ കാര്യത്തിലും നല്ല അറിവായിരുന്നു. ഒരു കാര്യത്തിലും നിർബന്ധമില്ല. വാശിയോ വഴക്കോ ഇല്ല. വീട്ടിലെ എല്ലാ കാര്യങ്ങളിലും അവൾക്ക് ശ്രദ്ധയുണ്ടായിരുന്നു. പണം അനാവശ്യമായി ചെലവഴിക്കില്ല.