MYOSITIS പ്രതിരോധിക്കാനാവുമോ?

ശരീര പേശികൾക്ക് തളർച്ച, ദുർബലമാകുന്ന രോഗപ്രതിരോധശക്തി... നടി സാമന്തയെ പിടികൂടിയ മയോസൈറ്റിസ് രോഗത്തെപ്പറ്റി കൂടുതലറിയാം

- പി.വി. സുരാജ്

നമ്മുടെ ദൈനംദിന പ്രവർത്തനങ്ങളെ എളുപ്പമാക്കിത്തീർക്കുന്നത് ശരീരത്തിലെ സന്ധികളും പേശികളും ചേർന്നാണ്. നിൽക്കാനും നടക്കാനും സാധനങ്ങൾ ഉയർത്താനും തുടങ്ങി ഏതു കാര്യങ്ങൾക്കും പേശികളും സന്ധികളും സഹായിക്കണം. അതുകൊണ്ടു തന്നെ ഇവയ്ക്കുണ്ടാകുന്ന പ്രശ്നങ്ങൾ ജീവിതം ദുസ്സഹമാക്കും. മയോസൈറ്റിസ് എന്ന ഓട്ടോ ഇമ്യൂൺ രോഗം അത്തരത്തിലുള്ളതാണ്. നടി സാമന്തയ്ക്ക് ഈയിടെ ഈ രോഗം ബാധിച്ചു. അതിനു ശേഷമാണ് മയോസൈറ്റിസിനെക്കുറിച്ച് ആളുകൾ കൂടുതലായി അറിഞ്ഞു തുടങ്ങിയത്.

ശരീരത്തിലെ പേശികളെ ദുർബലപ്പെടുത്തുന്ന അസുഖമാണ് മയോസൈറ്റിസ്. പ്രത്യേകിച്ച് കഴുത്തിലും തോളിലും തുടകളിലും ശരീരത്തിന്റെ പിൻഭാഗങ്ങളിലുമുള്ള പേശികളെയാണ് ഇത് ബാധിക്കുക. രോഗം ബാധിച്ചാൽ പേശികളിൽ നീർവീക്കവും എല്ലുകൾക്ക് ബലക്ഷയവും ശരീരത്തിന് വേദനയുമുണ്ടാകും. ശരീരത്തിന്റെ രോഗപ്രതിരോധശേഷിയെ ബാധിക്കുന്ന അസുഖമാണിത്. കുട്ടികളെന്നോ മുതിർന്നവരെന്നോ വ്യത്യാസമില്ലാതെ ഏത് പ്രായക്കാരെയും, ബാധിക്കാവുന്ന രോഗമാണിത്. സ്ത്രീകളിലും പുരുഷന്മാരിലും രോഗം കാണാറുണ്ട്. പല കാരണങ്ങൾ കൊണ്ട് മയോസൈറ്റിസ് വരാം. ചില മരുന്നുകളുടെ ഉപയോഗമോ അണു ബാധയോ ഇതിന് കാരണമായേക്കാം.

ലക്ഷണം

പേശികളിൽ കഠിനമായ വേദനയും ശരീരക്ഷീണവും ഉണർന്ന് എഴുന്നേൽക്കാനുള ബുദ്ധിമുട്ട്, ഇരിക്കാനും നിൽക്കാനുമുള്ള പ്രയാസം, തല ഉയർത്തിപ്പിടിക്കാനാവാത്ത അവസ്ഥ എന്നിവയും ലക്ഷണങ്ങളായി കണ്ടുവരാറുണ്ട്.

ദൈനംദിന പ്രവൃത്തികൾക്ക് ബുദ്ധിമുട്ട് അനുഭവപ്പെടും. ശ്വസിക്കാനും ഭക്ഷണം കഴിക്കാനും പ്രയാസമുണ്ടാകും.