അനിഷ്ടം വിഴുങ്ങി ജീവിക്കുന്നവർ

സ്ത്രീകൾ നല്ല ജീവിതം ആഗ്രഹിക്കുന്നത്, ജീവിതപങ്കാളിയോട് ഇഷ്ടാനിഷ്ടങ്ങൾ പറയുന്നത്, ആശയാഭിലാഷങ്ങൾ പങ്കുവയ്ക്കുന്നത് എല്ലാം കുറ്റമാകുന്നതെങ്ങനെ?

- ആർ. രാജശ്രീ

വധു ഡിമാൻഡിങ് ആകാമോ എന്നൊരു ചർച്ച നാം തുടങ്ങി വച്ചിരുന്നു. വധു മാത്രം എന്തിന് അങ്ങനെയല്ലാതിരിക്കണം എന്ന ചോദ്യം പതിഞ്ഞ സ്വരത്തിലാണെങ്കിലും ഉയരുന്നുണ്ട്. പെൺകുട്ടി ഡിമാൻഡിങ് ആവുന്നതിൽ പ്രശ്നമില്ലെന്നു പറയുന്ന പരസ്യങ്ങൾ വരുന്നുണ്ട്. പക്ഷേ, യഥാർഥജീവിതത്തിൽ അത് എത്ര കണ്ട് പ്രായോഗികമാകുമെന്ന് കണ്ടറിയണം. ഇന്ന് പെൺകുട്ടികൾ കൂടുതൽ വിദ്യാഭ്യാസം നേടുന്നുണ്ട്. പക്ഷേ, തൊഴിൽ പങ്കാളിത്തത്തിന്റെ കാര്യത്തിൽ കേരളത്തിലെ സ്ത്രീകൾ നാഗാലാൻഡ്, സിക്കിം, മണിപ്പുർ, മിസോറാം, അരുണാചൽ പ്രദേശ്, മേഘാലയ എന്നീ സംസ്ഥാനങ്ങളിലെ സ്ത്രീകളെക്കാൾ പിന്നിലാണെന്ന് എൻ.എസ്.എസ്.ഒയുടെ അറുപത്തെട്ടാം റൗണ്ടിലെ കണക്കുകൾ പറയുന്നു. കേരളത്തിലെ പുരുഷന്മാരുടെ തൊഴിൽ പങ്കാളിത്തത്തെക്കാൾ ( 57.8%) കുറവാണ് സ്ത്രീകളുടെ തൊഴിൽ പങ്കാളിത്തം (24.8%).

സാമ്പത്തിക സ്വാതന്ത്ര്യം സ്ത്രീയുടെ കുടുംബത്തിലെയും സമൂഹത്തിലെയും പദവികളെ സ്വാധീനി ക്കുമെന്നത് തീർച്ചയാണെന്നിരിക്കെ ഇതൊരു പിന്നോട്ടടി തന്നെയാണ്. എന്തുകൊണ്ടാവും സ്ത്രീകൾ സ്വയം ഉൾവലിയുന്നത്? വിവാഹത്തിനും അയവില്ലാത്ത പരമ്പരാഗത കുടുംബഘടനയ്ക്കും കേരളത്തിന്റെ പൊതു ബോധം കല്പിച്ചിരിക്കുന്ന ഗ്ലോറിഫൈഡ് പദവി തന്നെയാണ് പ്രധാനകാരണം. ഇതു രണ്ടും നിലനിർത്താൻ ഒരു സ്ത്രീക്ക് സ്വയം പലതവണ ബലിയാവേണ്ടി വരുമെന്നതാണ് വാസ്തവം. അവിടെയാണ് നാം പെൺകുട്ടികൾ ഡിമാൻഡിങ് ആവണമെന്നു പറയുന്നത്. ഇവിടെ പക്ഷേ, മറ്റൊരു വിഷയമാണ് നാം ചർച്ച ചെയ്യുന്നത്. എന്നാലും സാമ്പത്തികസ്വാശ്രയത്വത്തിന് ഇതിൽ വലിയ പങ്കുണ്ട്.