ഉയിരേ ഒരു ജന്മം നിന്നെ

മലയാളിയുടെ പാട്ടിന്റെ ഗൃഹാതുരതയാണ് കല്ലറ ഗോപൻ, അച്ഛൻ നടന്ന പാട്ടുവഴികളിലൂടെ ഉയിരിൽ തൊടുന്ന ശബ്ദമായി മകൾ നാരായണി ഗോപനും മനസ്സുകൾ കീഴടക്കുകയാണ്

- 

വർഷങ്ങൾക്ക് മുമ്പ്, കൂടൽമാണിക്യം ക്ഷേത്രത്തിലെ ഒരുത്സവകാലം, വർണത്തിൽ കുളിച്ച് നിൽക്കുന്ന ഉത്സവരാത്രി, അരങ്ങിൽ കല്ലറ ഗോപനുൾപ്പെടുന്ന സംഘത്തിന്റെ ഗാനമേള, മൈതാനത്ത് തിങ്ങിക്കൂടിയ ജനാവലി, കൈകളിൽ ഓരോ പാട്ട് കഴിയുമ്പോഴും നിറഞ്ഞ കരഘോഷങ്ങൾ... ഈ കാഴ്ചകളെല്ലാം കണ്ട് പിൻ സ്റ്റേജിൽ ഒരു കൊച്ചുകുട്ടി അമ്മയുടെ തൂങ്ങി നിൽക്കുന്നുണ്ടായിരുന്നു കല്ലറ ഗോപൻ മകൾ നാരായണി. അവളുടെ കണ്ണുകളിൽ ആ സന്തോഷരാത്രിയുടെ എല്ലാ തിളക്കവുമുണ്ടായിരുന്നു. പാട്ട് കഴിഞ്ഞുവന്ന അച്ഛനോട് അന്നവൾ ആദ്യമായി ഒരു ആഗ്രഹം അറിയിച്ചു “ അച്ഛാ, എനിക്ക് ഒരുപാട്ട് പാടണം...'' ആദ്യമായി സ്റ്റേജിൽ പാടണമെന്ന് പറഞ്ഞ മകളുടെ കൈയിലേക്ക്  മൈക്ക് കൊടുക്കാൻ കല്ലറ ഗോപന് അധികം ആലോചിക്കേണ്ടി വന്നില്ല. കാരണം അച്ഛനും അമ്മയിലും നിറഞ്ഞ അതേ സംഗീതം മകളിൽ നിന്നും ഉത്ഭവിക്കുമെന്ന് അത്രമേൽ ഉറപ്പുണ്ടായിരുന്നു. കുഞ്ഞു നാരായണി കൈകൾ കൊണ്ട് മുറുകെ പിടിച്ച മൈക്ക് ചുണ്ടോട് ചേർത്തു, “കണികാണും നേരം, കമലനേത്രന്റെ.. എന്ന് തുടങ്ങുന്ന ഗാനം കുഞ്ഞുചുണ്ടിൽ നിന്ന് കൂടൽമാണിക്യത്തിന്റെ ആകാശത്തിലേക്ക് ഉയർന്നു. ആ പാട്ട് കേട്ട് തെളിഞ്ഞ നിലാവിലും ഒരു ചാറ്റൽ മഴ അവിടെ പെയ്തിറങ്ങി. ആ മഴക്കുളിരിൽ കാണികളെല്ലാവരും നിലയ്ക്കാതെ കൈയടിച്ചു. വർഷങ്ങൾ കുറേ ഒഴുകിപ്പോയി, ഒരു ക്രിസ്മസ് കാലം, മഞ്ഞ് പെയ്യുന്ന രാത്രി, പെട്ടെന്ന് മലയാള സിനിമയിലേ ഒരു മിന്നലടിച്ചു, "മിന്നൽ മുരളി'. ആ സൂപ്പർ ഹീറോ ചിത്രം കണ്ടവരുടെ എല്ലാം ഉയിരിലേക്ക് ഒരുപാട്ട് കൂടുകൂട്ടി "ഉയിരേ ഒരു ജന്മം നിന്നെ, ഞാനും അറിയാതെ പോയോ..?', മനസ്സ് കുളിക്കുന്ന ഒരു ചാറ്റൽമഴപോലെ നാരായണി ഗോപൻ മലയാളി ഹൃദയങ്ങളിലേക്ക് പാടിയിറങ്ങുകയാണ്. തിരുവനന്തപുരത്തെ വീട്ടിലിരുന്ന് ഗായകൻ കല്ലറ ഗോപനും മകൾ നാരായണി ഗോപനും സംഗീത വഴികളിലെ കഥകളുടെ വാതിൽ തുറന്നു.