മലപ്പുറത്തെ 'ഊട്ടിത്തണുപ്പിൽ

ഊരകം മലയും മലമുകളിലെ പുരാതന ക്ഷേത്രവും കണ്ട് തിരിച്ചിറങ്ങിയാൽ കാഴ്ചകളുടെ പറുദീസയൊരുക്കി മിനി ഊട്ടി കാത്തിരിക്കുന്നു

- P V SURAJ

ഊട്ടിയിലെ കുളിര് മോഹിച്ച് മിനി ഊട്ടിയിലേക്ക് പോയാൽ ചിലപ്പോൾ നിരാശപ്പെടേണ്ടി വരും', മലപ്പുറം അരിമ്പ്രമലയിലെ മിനി ഊട്ടിയിലേക്ക് പോകാനൊരുങ്ങുമ്പോൾ അന്നാട്ടുകാരനായ സുഹൃത്ത് മുന്നറിയിപ്പ് തന്നിരുന്നു. ശരിക്കുള്ള ഊട്ടിയിൽ തന്നെ ഇപ്പോൾ തണുപ്പ് കുറവാണ്, നാട്ടിലെ ഊട്ടിയിലും അത്രയൊക്കെയേ കാണൂ എന്ന് മനസ്സിൽ കരുതി. പോകും മുൻപ് ഗൂഗിളിലൊന്ന് തിരഞ്ഞു. അപ്പോഴാണ് അതിനടുത്തുതന്നെ മൂന്ന് മലകൾക്കൂടിയുണ്ടെന്ന് അറിഞ്ഞത്. ഊരകം, അരി, ചെരുപ്പടി എന്നിങ്ങനെ. മലകയറി മുകളിലെത്തിയാൽ കാഴ്ചകൾ  ഏറെയുണ്ടത്രേ. അങ്ങനെ ആദ്യം ഊരകം മലകയറാനും പിന്നെ മിനി ഊട്ടിയിലെ സൂര്യാസ്തമയം കാണാനും തീർച്ചപ്പെടുത്തി. നേരെ പുറപ്പെട്ടു, മലപ്പുറത്തിന്റെ മണ്ണിലേക്ക്.

ദേശീയപാതയിൽ കൂരിയാട്ടു നിന്ന് വേങ്ങരയിലേക്ക് തിരിഞ്ഞു. കുറെദൂരം പോയി പൂളാപ്പീസ് എന്ന സ്ഥലത്തെത്തി. ഊരകം മലയുടെ അടിവാരമാണ് ഇത്. മലയിലേക്കുള്ള യാത്ര ഇവിടെ തുടങ്ങുകയാണ്. മുകളിലേക്ക് കയറുന്നതിനിടെ വലിയ ടിപ്പർലോറികളും ടോറസുകളും എതിരേ വരുന്നതു കണ്ടു. വിനോദസഞ്ചാര കേന്ദ്രത്തിൽ ടോറസുകൾക്കെന്തു കാര്യം? മുന്നോട്ടു പോകവേ കാര്യങ്ങൾ തെളിഞ്ഞു വന്നു. മൂന്ന് മലകളിലുമായി അൻപതോളം ക്വാറികളും ക്രഷറുകളുമുണ്ട്. പാറ പൊട്ടിച്ച് കൊണ്ടുപോവുകയാണ്.

തെങ്ങിൻ തോപ്പുകളും റബ്ബർ തോട്ടങ്ങളും അതിരിടുന്ന താഴ്വാരം. വളരെ കുറച്ച് വീടുകളേ അവിടെ കണ്ടുള്ളൂ. കുടിയേറ്റത്തിന്റെ തുടക്കകാലത്ത് ഇവിടെ ആൾത്താമസമുണ്ടായിരുന്നു. ഇടുക്കി, കോട്ടയം ഭാഗത്തു നിന്നുള്ളവരായിരുന്നു ആദ്യമെത്തിയത്. പിന്നീട് ക്വാറിയും പാറപൊട്ടിക്കലും ആരംഭിച്ചതോടെ ആളുകൾ താമസം മതിയാക്കി. കാഴ്ചകൾ കണ്ടുകണ്ട് ഒടുവിൽ മലയുടെ താഴെയെത്തി. എങ്ങനെ കയറും മുകളിലേക്ക്? അവിടെ ഒരു പഴയ ക്ഷേത്രമുണ്ടെന്ന് കേട്ടിരുന്നു, ഇതു തന്നെയാണോ വഴി? ഒന്ന് ചോദിക്കാൻ അടുത്തൊന്നും ആരുമില്ല. ഒടുവിൽ ആദ്യം കണ്ട വഴിയിലൂടെ മലകയറ്റം തുടങ്ങി.