தமிழர்களை துரத்துகின்ற தவறு

ஐ.நா. மனித உரிமைகள் ஆணையாளரை சந்திக்க முற்பட்ட முன்னாள் இராணுவ அதிகாரிகளில் ஒருவர், 2009 ஆம் ஆண்டு போர் முடிவுக்கு வந்த பின்னர், இடம்பெற்ற ஜனாதிபதி தேர்தலில், எதிர்க்கட்சிகளின் பொதுவேட்பாளராக நிறுத்தப்பட்ட முன்னாள் இராணுவ தளபதி பீல்ட் மார்ஷல் சரத் பொன்சேகாவுக்கு, வடக்கு கிழக்கில் உள்ள தமிழர்கள் பெருவாரியாக வாக்களித்திருந்தனர் என்பதை நினைவு கூர்ந்திருந்தார்.

- 

போர்க்காலத்திலும் சரி, போருக்கு பின்னரான சூழலில் சரி, சிங்கள மக்களால் கொண்டாடப்படுபவர்களாக இருந்தவர்கள் அவர்கள்.

மஹிந்த ராஜபக்ஷ அரசாங்கத்திலும், அதற்கு பின்னர் ஆட்சிக்கு வந்த அரசாங்கங்களினாலும், அவர்கள் முக்கியமான இராஜதந்திரப் பதவிகளில் அமர்த்தப்பட்டார்கள். அவர்களுக்கு, ஐக்கிய நாடுகள் சபையில், வெளிநாடுகளில் உள்ள இலங்கைத் தூதரகங்களில், முக்கியமான பதவிகள் வழங்கப்பட்டு, கௌரவிக்கப்பட்டார்கள்.

அதேவேளை, அவர்கள் மீது தமிழர் தரப்பினால் போர்க் குற்றச்சாட்டுக்கள் முன்வைக்கப்பட்டன. சர்வதேச மனித உரிமை அமைப்புகளும், அந்தக் குற்றச்சாட்டுகளை முன்வைத்திருந்தன.

அந்தக் குற்றச்சாட்டுகளின் காரணமாக, இறுதிக் கட்டப் போரில் முக்கிய பங்கு வகித்த பலர், இப்பொழுது வெளிநாடுகளில் தடைகளை எதிர்கொண்டிருக்கிறார்கள்.

அவர்களால் வெளிநாடுகளில் பயணம் மேற்கொள்ள முடியாத நிலை ஏற்பட்டிருக்கிறது.

அமெரிக்காவினால் பயணத் தடை விதிக்கப்பட்டுள்ள முன்னாள் இராணுவத் தளபதி ஜெனரல் சவேந்திர சில்வா, தம்மால் தெற்காசிய நாடுகளுக்குக் கூட, இலகுவாகப் பயணம் செய்ய முடியாத நிலை இருப்பதாகக் கூறியிருந்தார்.

அவர்களின் இந்த நிலைமைக்குக் காரணம், இறுதிக் கட்டப் போரில் அவர்கள் வகித்த பங்கு.

இறுதிக் கட்டப் போரில் இடம் பெற்ற மனித உரிமை மீறல்கள், இவற்றுக்குத் தீர்வு காண்பதற்கு இது வரை நடவடிக்கை எடுக்கப்படாமல் இருப்பது. போர் ஒன்றில் அழிவுகள், இழப்புக்கள் ஏற்படுவது இயல்பு.

ஆனால், இறுதிக் கட்டப் போரில் பங்கெடுத்தவர்களைத் தாண்டி குற்றங்கள் இழைக்கப்பட்டிருந்தன.

சர்வதேச மனிதாபிமானச் சட்டங்களையும், மனித உரிமைச் சட்டங்களையும் மீறும் வகையில், மனித குலத்துக்கு எதிரானதாகவும் அந்தக் குற்றங்கள் இடம்பெற்றிருந்தன.

அவை இனப்படுகொலை அல்லது இனஅழிப்பு எனக் கூறத்தக்களவுக்கு மோசமானவையாக இருந்தன.

அதன் அடிப்படையில் தான், இலங்கையின் படை அதிகாரிகள் பலருக்கும், வெளிநாடுகளில் தடைகள் விதிக்கப்பட்டிருக்கின்றன.

ஆனால், இந்தத் தடைகள் அவர்களுக்குப் பெரியளவில் பாதிப்புகளை ஏற்படுத்தியிருப்பதாகச் சொல்ல முடியாது.