ஐ.நா.மனித உரிமைகள் ஆணையாளர் சாதிப்பாரா?

ஐ.நா. மனித உரிமைகள் ஆணையாளர் வோல்கர் டேர்க்கின் இலங்கைப் பயணம் பலத்த அதிர்வலைகளை உருவாக்கியுள்ளது. அவரது பயணம் கொழும்புடன் மட்டும் நிறுத்தப்பட்டிருந்தால் இந்த அதிர்வலைகள் உருவாகியிருக்காது. தமிழர் தாயகத்திற்கும் பயணம் செய்தபடியால் தான் இவை உருவாகியிருக்கின்றன.

- 

அரசாங்கத்திற்கும் இது சங்கடமான நிலை தான். அரசாங்கம் அவரது பயணத்தை கொழும்புடன் மட்டும் மட்டுப்படுத்தவே விரும்பியிருந்தது. அரசாங்கம் அவரை அழைத்ததன் நோக்கமே செப்டம்பரில் வரப்போகும் புதிய பிரேரணையில் இலங்கை தொடர்பாக கனதியான விடயங்கள் உள்ளடங்குவதைத் தடுப்பதுதான். அந்த நினைப்பில் தற்போது மண் விழுந்துள்ளது.

செப்டெம்பருக்கு முன்னர் ஆணையாளர் பயணம் செய்வதை தமிழ் சிவில் அமைப்புகள் விரும்பியிருக்கவில்லை. புதிய பிரேரணையின் கனதி குறைந்துவிடும் என்பதற்காகத்தான் அவர்கள் அதை விரும்பியிருக்கவில்லை. தற்போது வரவேண்டாம் என்றே அவை கேட்டிருந்தன. அவர் வருவது உறுதி எனத் தெரிந்த பின்னர் தான் தாயகத்திற்கும் வரவேண்டுமென வலியுறுத்தல்களை விடுத்தன. குறிப்பாக, செம்மணி புதைகுழிகளைப் பார்வையிட வேண்டும் என வலியுறுத்தல்களை விடுத்தது. ஆணையாளரின் ஆரம்ப நிகழ்ச்சி நிரலில் தாயகப் பயணம் இருக்கவில்லை. பின்னரே நிகழ்ச்சி நிரல் மாற்றப்பட்டு தாயகப் பயணமும் நிகழ்ச்சி நிரலில் சேர்க்கப்பட்டது.

ஆணையாளரும் மக்களைச் சந்திப்பதில் கனிவானாக நடந்துகொண்டார். திருகோணமலையில் மக்கள் போராட்டத்தை நேரடியாகப் பார்வையிட்டார். மக்கள் கவலைகளை ஆறுதலாகக் கேட்டு மகஜரையும் பெற்றுக்கொண்டார். யாழ்ப்பாணம் வருகை தந்தபோது செம்மணி புதைகுழிகளையும் பார்வையிட்டு அணையா விளக்குப் போராட்டத்திலும் கலந்துகொண்டார். அணையா விளக்கிற்கு அஞ்சலியும் செலுத்தினார். பாதிக்கப்பட்ட மக்களின் ஒவ்வொரு தரப்பினருடனும் சுமுகமாகக் கலந்துரையாடி மகஜர்களையும் பெற்றுக்கொண்டார். தமிழ்க் கட்சிகளையும் சிவில் அமைப்புகளையும் சந்தித்துப் பேசினார்.

இந்த விவகாரத்தில் 'மக்கள் செயல்' அமைப்பினரால் முன்னெடுக்கப்பட்ட அணையா விளக்குப் போராட்டம் பல அடைவுகளைப் பெற்றிருக்கின்றது என்றே கூறலாம். அதில் முதலாவது மக்களைத் திரளாக்கியமையாகும். 'பொத்துவில் முதல் பொலிகண்டி வரை' போராட்டத்திற்குப் பின்னர் மக்கள் தாமாகவே திரளாகக் கலந்துகொண்டமை இப்போராட்டத்தில் தான்.