சரணாகதி அரசியலில் பதவிகளே முக்கியமாகின்றன

‘ரோசம் கெட்டவன் ராசாவிலும் பெரி யவன்’ என்று சொல்வார்கள். இதனை அரசி யலில் தெளிவாகக் காணலாம். இன்று ஒரு கட்சியில் இருப்பவர் நாளை இன்னுமொரு கட்சிக்குத் தாவிவிடுவார். பதவியும், பணமும்தான் அவர்கள் இருக்கின்ற கட்சியைத் தீர்மானம் செய்கின்றன. இந்தப் போக்கு முஸ்லிம் அரசியலில் நிறைந்து காணப்படுகின்றது. இதற்கு முஸ்லிம் கட்சிகளின் பாராளுமன்ற உறுப்பினர்கள், உயர்பீட உறுப்பினர்கள் மட்டுமன்றி கட்சிகளின் தலைவர்களும் சோரம்போயுள்ளனர்.

- எம்.எஸ்.தீன்

இந்த ரோசம் கெட்ட வேலைகளினால் முஸ்லிம் கட்சிகளின் ஆதரவாளர்கள் பலரும் ஆத்திரப்பட்டுக் கொண்டிருக்கின்றார்கள். முஸ்லிம் அரசியல்வாதிகள் தங்களின் சுய அரசியல் இலாபத்திற்காக முஸ்லிம் சமூகத்தைப் பிரித்தாளுகை செய்துகொண்டிருக்கின்றார்கள். இதனை முஸ்லிம்கள் சரியாகப் புரிந்துகொள்ளாத வரை முஸ்லிம்களின் அரசியல் பிழையான பாதையிலே பயணித்துக் கொண்டிருக்கும் என்பதில் ஐயமில்லை.

தேர்தல் என்று வந்தால் முஸ்லிம் கட்சியினர் ஆளுக்கு ஆள் வசை பாடுவார்கள். சமூகத் துரோகி என்றெல்லாம் திட்டிக் கொள்வார்கள்.

முஸ்லிம் அரசியல் கட்சிகளையும், தலைவர்களையும் எடுத்துக் கொண்டால் நிரந்தரமான கொள்கை என்று எதுவும் அவர்களிடம் கிடையாது. தங்களின் சுய இலாபத்துக்கேற்பப் பேசுவார்கள். கூட்டு வைத்துக் கொள்வார்கள். பிரிந்து செல்வார்கள். பிரிந்தவர்கள் மீண்டும் இணைந்து கொள்வார்கள். வசை பாடுதல்களும், புகழ்ந்துரைப்பதும் முஸ்லிம் அரசியல்வாதிகளிடம் பழகிப் போனதாகும்.

முஸ்லிம் கட்சிகளையும், அவற்றின் தலைவர்களையும் ஒரு குறுகிய காலத்திற்குள்ளேயே மிகக் கடுமையாக விமர்சனம் செய்து வறுத்தெடுத்தவர்தான் முன்னாள் பாராளுமன்ற உறுப்பினர் முஷாரப்.

அவர் கடந்த 25ஆம் திகதி முஸ்லிம் காங்கிரஸில் இணைந்து கொண்டுள்ளார். முஸ்லிம் காங்கிரஸின் முக்கியஸ்தர்கள் சிலரினதும், ஆதரவாளர்கள் பலரினதும் எதிர்ப்பையும் கடந்தே முஷாரப் முதுநபீனை ரவூப் ஹக்கீம் கட்சியில் இணைத்துள்ளார்.

அரசியல் ஆட்டத்தில் ரவூப் ஹக்கீம் வல்லவர் என்றே சொல்ல வேண்டும். ரவூப் ஹக்கீம் தமது கட்சியில் முஷாரப்பை இணைத்துக் கொண்டமை தம்மைப் படுமோசமாக விமர்சனம் செய்த முஷாரப்பைப் பழிதீர்த்துக் கொள்வதற்காகவா அல்லது கட்சியின் செல்வாக்கை உயர்த்திக் கொள்வதற்காகவா என்பதற்குக் காலம் பதில் தரும்.

முஷாரப், தமது அரசியலை 2020இல் அகில இலங்கை மக்கள் காங்கிரஸினூடாக ஆரம்பித்தார். ரிஷாத் பதியுதீனின் கருணையால்தான் பாராளுமன்றத் தேர்தலில் போட்டியிட்டு பாராளுமன்ற உறுப்பினராகத் தெரிவு செய்யப்பட்டார்.

அவர் முஸ்லிம் காங்கிரஸின் அரசியலையும், அதன் தலைவர் ரவூப் ஹக்கீமின் நடவடிக்கைகளையும் படுமோசமாக விமர்சனம் செய்தார். அரச தொலைக்காட்சியில் வேலை செய்த தன்னைப் பணி நீக்கம் செய்வதற்கு ரவூப் ஹக்கீமே காரணமென்றும் கூறினார். ரிஷாத் பதியுதீனை அளவுகடந்து புகழ்ந்து பேசினார்.