மக்களின் வாக்குகளை விலைபேசும் கலாசாரம்

ஒரு காலத்தில் சில அரசியல்வாதிகள் செய்த 'டீலுக்காக' அல்லது பணம், பதவிக்கு சோரம் போகின்றார்கள் என்பதற்காக அவர்களை நாம், 'அரசியல் வியாபாரிகள்' என்று விமர்சித்ததுண்டு.

- ஏ.எல். நிப்றாஸ்

ஆனால், இப்போது மக்களுக்கு எதையாவது கைமாறாகக் கொடுத்து, அவர்களது வாக்குகளை விலைபேசும் வியாபாரம் புதிய நிதர்சனமாக உருவெடுத்து வருவதாகத் தோன்றுகின்றது.

தமது கொள்கைகளால் மக்களைக் கவர்ந்து, தேர்தல் விஞ்ஞாபனங்களுக்காக வாக்களிக்குமாறு, மக்களைக் கோருகின்ற போக்கு இன்னும் காணப்படுகின்ற போதிலும், ஒரு சிலர் வாக்குகளை விலைபேசும் கலாசாரத்தை வளர்க்க முற்படுவதாகத் தெரிகின்றது.

வாக்காளப் பெருமக்களுக்குப் பணத்தை, உணவுப்பொருளை, ஏதாவது ஒரு கட்டணத்தைக் கொடுத்துவிட்டு வாக்குகளைப் பெற்றுக் கொள்ள முற்படுகின்ற கலாசாரம் உருவாகி வருகின்றது. நாட்டில் பல இடங்களில் இந்த நிலைமை உள்ளது. அதிலும் குறிப்பாக வடக்கு, கிழக்கின் முஸ்லிம் பிரதேசங்களில் இதனைத் தீவிரமாக அவதானிக்க முடிகின்றது.

முன்னைய காலங்களில் இருந்த, கொள்கைசார் அரசியல் தலைவர்களைச் சமூகம் மெல்ல மெல்ல இழந்து வருவதைப் போல, கால ஓட்டத்தில் இந்த நச்சுவட்டம் ஒரு குறிப்பிட்டளவான மக்களையும் கெடுத்துக்குட்டிச் சுவராக்கியுள்ளது. கொள்கைக்காக, சமூகத்தின் நன்மைக்காக அன்றி, கைமேல் உடனடிப் பிரதிபலன் ஒன்றை எதிர்பார்த்து வாக்களிக்கின்ற போக்கும் அதிகரித்து வருகின்றது.

தான் செய்த எந்த சேவையையும் சொல்லி மக்களிடம் வாக்குப் பெற முடியாத அல்லது தன் மீதான மக்களின் நம்பிக்கையைக் கொள்கையளவில் சம்பாதிக்க முடியாத பாராளுமன்றத் தேர்தல் வேட்பாளர்கள் முதல், வட்டார வேட்பாளர்கள் வரை எல்லோருமே எதையாவது கொடுத்து மக்களின் வாக்குகளை விலைபேசுகின்ற நிலைமைகள் அதிகரித்து வருகின்றன.

இதனை இந்தத் தேர்தலிலும் பரவலாக அவதானிக்க முடிந்தது. இதற்குப் பல கட்சிகள் சார் கணிசமான வேட்பாளர்கள் விதிவிலக்காகத் தெரியவில்லை என்றே கூறலாம். குறிப்பிட்ட கட்சி இதற்காக நிதியைக் கொடுக்காவிட்டாலும் குறிப்பிட்ட வட்டார வேட்பாளரிடம் நிதி இருந்தால், அதனைத் தவிர மக்களிடம் வாக்குக் கேட்பதற்கு அவருக்கு வேறு எந்த வழியும் இருக்கவில்லை என்றால் அதனை அவர்கள் மிக நூதனமாகப் பயன்படுத்தினார்கள் எனலாம்.

பல இடங்களில் இதுதான் களநிலையதார்த்தமாகக் காணப்பட்டது. இவ்வாறான விடயங்களைப் பற்றி மக்கள் தமக்குள் பேசிக் கொள்கின்றார்கள். சிலர் சமூக வலைத்தளங்களில் பதிவிடுகின்றார்கள். ஏன், அரசியல் மேடைகள் தொடக்கம் பாராளுமன்றம் வரை இவ்வாறான தகவல்கள் சுட்டிக்காட்டப்பட்டுள்ளன.