பிரதேச சபைத் திருத்தச் சட்டம் வலுப்படுத்தப்படுமா?

இலங்கையில் உள்ளூராட்சி சபைகளுக்கு நீண்ட வரலாறு உள்ளது.

- சுப்ரமணியம் தியாகு நானுஓயா நிருபர்

பண்டைய காலங்களில் கிராம சபைகள் கிராம நிர்வாகத்தின் அடிப்படையாக இருந்தன.

இவை மக்களின் முறைப்பாடுகளை ஆராய்ந்து குறைகளை தீர்ப்பதற்கான அமைப்பாக செயல்பட்டன. 1833 ஆம் ஆண்டு பிரித்தானிய ஆட்சி காலத்தில் உள்ளூர் ஆட்சி அமைப்புகள் மறுசீரமைக்கப்பட்டன.

1865 ஆம் ஆண்டு Municipal Council ordinance No 17 மூலம் கொழும்பு மற்றும் கண்டி நகரங்களுக்கு மாநகர சபைகள் நிறுவப்பட்டன.

இவை இலங்கையில் உள்ளூராட்சி சபைகளின் ஆரம்பமாக கருதப்படுகின்றன. அதனைத் தொடர்ந்து 1939 ஆம் ஆண்டு நகர சபைகள் உருவாக்கப்பட்டன.

1987 ஆம் ஆண்டு 13 ஆவது திருத்தச் சட்டத்தின் மூலம் உள்ளூராட்சி நிர்வாகம் மாகாண சபைகளின் கீழ் மாற்றப்பட்டது. அதே ஆண்டில் பிரதேச சபை சட்டம் நிறைவேற்றப்பட்டு 1988 ஆம் ஆண்டு ஜனவரி முதலாம் திகதி முதல் 257 பிரதேச சபைகள் செயற்பட தொடங்கின.

சுருக்கமாக கூறினால் இலங்கையில் உள்ளூராட்சி சபைகள் 1865 ஆம் ஆண்டு கொழும்பு மாநகர சபையின் நிர்வாகத்துடன் ஆரம்பிக்கப்பட்டன. அதனைத் தொடர்ந்து பல்வேறு காலங்களில் சட்டத்திருத்தங்கள் மற்றும் நிர்வாக மாற்றங்கள் மூலம் உள்ளூராட்சி அமைப்புகள் விரிவடைந்தன. உள்ளூராட்சி சபைகள் பல்வேறு காலகட்டங்களில் மாற்றங்களுக்கு உட்படுத்தப்பட்டாலும் எந்த ஒரு கட்டத்திலும் அவை பெருந்தோட்ட மக்களுக்கான அபிவிருத்தி செயற்பாடுகளை முன்னெடுக்க முடியாத நிலையிலேயே செயற்பட்டு வந்தன.

2006 ஆம் ஆண்டு உடபலாத்த பிரதேச சபையானது தனது பிரதேசத்திற்கு உட்பட்ட நியூ பீகொக், செல்வகந்த, மெல்போட் ஆகிய பெருந்தோட்ட பகுதிகளுக்கு அபிவிருத்தி பணிகளை முன்னெடுத்ததன் காரணமாக அப்போதைய மத்திய மாகாண முதலமைச்சர் சரத் ஏக்கநாயக்க உடபலாத்த பிரதேச சபையை கலைத்து அதன் ஆட்சியை முடிவிற்கு கொண்டு வந்தார்.

இலங்கையில் மலையக சமூகம் 200 ஆண்டுகளை கடந்து வாழ்ந்து கொண்டிருக்கின்ற நிலையில், அவர்களை இந்த நாட்டு மக்களாக கருதாது, ஏனைய சமூகங்கள் அனுபவிக்கின்ற உரிமைகளை அனுபவிக்க முடியாத சூழ்நிலையை பிரதேச சபை சட்டங்கள் கொண்டிருந்தன.