இலங்கையில் ஆசிரிய -வெளியீட்டாளர்களும் அவர்களுக்கான பதிப்புரிமையும் (பகுதி-1)

கார்த்திகை 2007இல் வெளி வந்திருந்த எனது 'மலேசிய - சிங்கப்பூர் நூல்தேட்டத்தில்' 99ஆம் இலக்க நூற்பதிவொன்று 'படிப்பது எப்படி?' என்ற தலைப்பில் இடம் பெற்றிருந்தது.

- 

எழுதியவர் யார் என்ற விபரமில்லாமலும், வெளியீட்டாளர் விபரமில்லாமலும் ஈ.வீ. எஸ். என்டர்பிறைசஸ், மாக்ஸ்வெல் வீதி, த.பெ.எண். 1995, சிங்கப்பூர் 9039 என்ற நிறுவனத்தினால் 44 பக்கங்களில் அச்சிடப்பட்டு விற்பனை செய்யப்பட்டு வந்தது.

படிப்பது பற்றிப் படிப்பதன் அவசியம் என்ன என்பதை விளக்கி, கற்றல் தொடர்பான சில அடிப்படைப் பிரச்சினைகளை விளக்கி, நேரசூசி அமைத்தல், நூல்களை வாசித்தல், குறிப்பெடுத்தல், பரீட்சைக்கு ஆயத்தம் செய்தல் என்பன போன்ற நடைமுறைகளுக்கு ஆலோசனை வழங்குவதாக இந்நூல் அமைகின்றது. பரீட்சைப் பாடநூலும் அதைப் படிக்கும் வகையும், கட்டுரை வடிவில் அமைந்த விடைகளை எழுதுதல் போன்றவற்றையும் இந்நூலின் ஆசிரியர் விளக்கியிருந்தார். இந்நூலின் எழுத்துப்போக்கு ஈழத்தின் பிரபல எழுத்தாளரும் பள்ளி ஆசிரியருமான க.சொக்கலிங்கத்தின் (எழுத்தாளர் சொக்கள்) பாணியை ஒத்ததாக என்னால் அனுமானிக்க முடிந்தது.

இங்கு சுவாரஸ்யமான விபரம் என்னவென்றால் ஆகஸ்ட் 1973 இல் 'படிப்பது எப்படி?' என்ற அதே தலைப்பில் சொக்கன் மாணவர்களுக்காக ஒரு சிறு நூலை எழுதியிருந்தார். அதனை பேராசிரியர் செ.சிவஞானசுந்தரம் (எழுத்தாளர் நந்தி) கொழும்பிலிருந்து தனது 'நந்தி வெளியீடாக' வெளியிட்டிருந்தார். நாவலப்பிட்டி, ஆத்ம ஜோதி நா.முத்தையா அந்நூலை ஆத்மஜோதி அச்சகத்தில் அச்சிட்டு விநியோகித்திருந்தார். அக்கால கட்டத்தில் அது பள்ளி மாணவர்களிடையே மிகவும் வரவேற்பைப் பெற்றிருந்த நூல். அந்நூலின் மேலட்டை கூட ஈழத்தின் பிரபல ஓவியர் 'வி.கே' (வி.கனகலிங்கம்) வினால் வரையப்பட்டிருந்தது.

சிங்கப்பூரில் வெளியிடப்பட்டிருக்கும் இந்நூலும் 'வி.கே'யின் அதே ஓவியத்துடன் காணப்பட்டபோதிலும், அதிலிருந்த ஓவியரின் 'வீ.கே.' என்ற கையெழுத்து அழிக்கப்பட்டிருந்தது. சொக்கனின் பெயரும் அங்கு ஆசிரியர் பெயராகக் குறிப்பிடப்பட்டிருக்கவில்லை. அதே நூலின் மீள்பதிப்பாக சிங்கப்பூரில் சட்டபூர்வமாக வெளியிடப்பட்டிருந்தால் ஆசிரியரின் பெயரும், ஓவியரின் பெயரும் நீக்கப்பட்டிருக்கக் கூடாது. 1973களில் அன்றைய எழுத்தாளர்கள் பதிப்புரிமை பற்றிய புரிதலின்றி இருந்தமையாலும், அவர்களின் கடல்கடந்த கண்காணிப்புக்கு வழியற்றிருந்தமையாலும் இந்த நிலைமை காணப்பட்டிருக்கலாம்.