வாக்களிப்பில் பங்கேற்பின்மையும் நிராகரிக்கப்படும் வாக்குகளும் வட, கிழக்கில் தொடர் அதிகரிப்பு

உள்ளூராட்சி மன்றங்களுக்கான தேர்தல் நிறைவுக்கு வந்துள்ள நிலையில் தற்போது ஆட்சி அதிகாரங்களை கைப்பற்றுவதற்கான தீவிரமான பேச்சுவார்த்தைகள் நடைபெற்றுக்கொண்டிருக்கின்றன.

- ஆர்.ராம்

வடக்கு, கிழக்கில் தமிழ்த் தேசிய கொள்கைத் தளத்தில் பிரிந்து நின்று பயணிக்கும் தரப்புக்கள் வடக்கு, கிழக்கில் வாக்குவங்கியில் எழுச்சி அடைந்திருக்கின்றன. அதனையிட்டு மார் தட்டிக்கொள்கின்றன. ஆனாலும் தனித்து ஆட்சி அமைப்பதற்கான இயலுமை (ஓரிரு சபைகளில் தமிழரசுக் கட்சிக்கு அறுதிப்பெரும்பான்மை காணப்படுகிறது) எந்தவொரு தரப்பிற்கும் காணப்படவில்லை.

நிலைமைகள் இவ்வாறிருக்கையில், தேர்தல் வாக்களிப்பில் மக்கள் பங்கேற்காத நிலைமைகளும் வாக்குகள் நிராகரிக்கப்படுகின்ற எண்ணிக்கையும் தொடர்ச்சியாக அதிகரித்துச் செல்வதை கடந்த மூன்று தேர்தல்களின் புள்ளிவிபரங்கள் ஊடாக அவதானிக்க முடிகின்றது.

இந்த நிலைமையானது, நாடளவிய ரீதியில் காணப்பட்டாலும், வடக்கு, கிழக்கில் நிலைமை தொடர்ச்சியாக மோசமடைந்து வருவதை உறுதிப்படுத்தக்கூடியதாக இருக்கின்றது. இதற்கு பல கருத்தியல் ரீதியான வாதப்பிரதவாதங்களை முன்வைக்க முடியும். ஆனால், அதற்கப்பால் சிந்தித்து செயற்பட வேண்டிய நிலை ஏற்பட்டுள்ளது.

நாடளவிய நிலை

ஏனென்றால், இம்முறை வாக்காளர் இடாப்பில் புதிதாக உள்வாங்கப்பட்ட 155,976 பேருடன் 17,296,330 பேர் வாக்களிக்கத் தகுதி பெற்றிருந்த நிலையில் 10,616,087 பேரே வாக்களிப்பில் பங்கேற்றிருந்தனர்.

அதில் 10,410,810 வாக்குகள் மட்டுமே செல்லுபடியானவையாக காணப்படுவதோடு 205,277 வாக்குகள் நிராகரிக்கப்பட்ட நிலையில் அது 1.93 சதவீதமாக காணப்படுகின்றது. கடந்த ஆண்டு நடைபெற்ற ஜனாதிபதித் தேர்தலின்போது நிராகரிக்கப்பட்ட வாக்குகள் 300,300 ஆக காணப்பட்டதோடு அதன் சதவீதம் 2.2 ஆகும்.

அதேபோன்று கடந்தாண்டு நடைபெற்ற பாராளுமன்றத் தேர்தலில் 667,240 வாக்குகள் நிராகரிக்கப்பட்டிருந்ததோடு அதன் சதவீதம் 5.65ஆகும். அந்த வகையில் பார்க்கின்றபோது இத்தேர்தலில் நிராகரிக்கப்பட்ட வாக்குகளின் எண்ணிக்கை குறைவடைந்திருக்கின்றது.

ஆனால், ஜனாதிபதித் தேர்தலில் 3,820,738 வாக்காளர்கள் வாக்களிக்கவில்லை. பாராளுமன்றத் தேர்தலில் 5,992,348 வாக்காளர்கள் வாக்களிக்கவில்லை. இந்நிலையில் இந்த உள்ளூராட்சி மன்றங்களுக்கான தேர்தலில் 6,747,528 வாக்காளர்கள் வாக்களித்திருக்கவில்லை.

வட, கிழக்கில் மோசமான நிலை