சென்னைப் பல்கலைக்கழக வரலாற்றுத் துறை ஏற்பாட்டில் சர். வில்லியம் மெயர் நினைவு அறக்கட்டளை கருத்தரங்கம்

"சமூக நீதி - நேற்று, இன்று, நாளை"-திராவிடர் கழகத் தலைவர் தமிழர் தலைவர் கி.வீரமணி விளக்கவுரை

- 

சென்னைப் பல்கலைக் கழக வரலாற்றுத் துறை ஏற்பாட்டில் சர். வில்லியம் மெயர் நினைவு அறக்கட்டளை சார்பில் 29.11.2022 அன்று கருத்தரங்க நிகழ்வு நடைபெற்றது. ‘சமூகநீதி - நேற்று, இன்று, நாளை' எனும் தலைப்பில் நடைபெற்ற கருத்தரங்கில் திராவிடர் கழகத்தின் தலைவர் ஆசிரியர் கி.வீரமணி தலைமை வகித்தார். பொருளாதாரப் பேராசிரியர் மு.நாகநாதன், தமிழ்நாடு அரசின் சமூக நீதி கண்காணிப்புக் குழுவின் உறுப்பினர் கோ.கருணாநிதி ஆகியோர் பங்கேற்று சமூகநீதி வரலாற்று கருத்துகளை வழங்கினர்.

கருத்தரங்கில் தமிழர் தலைவருக்கு 

90ஆம் ஆண்டு பிறந்த நாள் வாழ்த்து

 

கருத்தரங்கத்திற்கு தலைமை வகித்து உரையாற்றிய தமிழர் தலைவரின் 90ஆம் ஆண்டு பிறந்த நாள்  - டிசம்பர் 2ஆம் நாள் என கருத்தரங்கினை ஏற்பாடு செய்த வரலாற்றுப் பேராசிரியர் எஸ்.எஸ்.சுந்தரம் அறிவித்ததும் கருத்தரங்கமே மகிழ்ச்சிப் பெருவெள்ளம் கண்டது. 

90 ஆண்டு வாழ்வில் தனது 80 ஆண்டு கால பொது வாழ்க்கையினை சமூகத்திற்கு, மனிதகுலத்திற்கு - ஒட்டுமொத்த மேம்பாட்டிற்கு வழங்கிய தமிழர் தலைவருக்கு, வருகை தந்த பேராசிரியப் பெருமக்கள், கல்வியாளர்கள், சமூகநீதி செயல்பாட்டாளர்கள், மாணவ - மாணவியர் என அனைவரும் எழுந்து நின்று பெரும் கரவொலி எழுப்பி தங்களது வாழ்த்தினைத் தெரிவித்தனர். தமிழர் தலைவர் உரை வீச்சுக்குப் பின்னர் அரங்கமே கரவொலியில் எழுச்சி வெள்ளத்தில் திளைத்தது. ஒப்பில்லா சமுதாயப் பணியாற்றி வரும் தமிழர் தலைவருக்கு நன்றிப் பெருக்கினை தெரிவிக்கும் வகையில் வாழ்த்துகளை வெளிப்படுத்தி அனைவரும் மகிழ்ந்தனர்.

பல்கலைக்கழக குற்றவியல் துறை கருத்தரங்கக் கூடத்தில் காலை 11 மணிக்குத் தொடங்கிய நிகழ்வில் சென்னைப் பல்கலைக் கழகத்தின் பல துறைகளின் தலைவர்கள், பேராசிரியர்கள், மேனாள் கல்விப் பணி ஆற்றிய அறிஞர் பெருமக்கள் மற்றும் மாணவர்கள் பெரும் அளவில் பங்கேற்றுச் சமூகநீதிக் கருத்து உரை வெள்ளத்தில் தோய்ந்து மகிழ்ந்து நல் ஆக்கம் பெற்றனர்.