స్వర్గం-నరకం

స్వర్గం-నరకం

- యామిజాల జగదీశ్

ఓ గుడిలో ప్రవచనం సాగుతోంది.ఓ పెద్దాయన మాట్లాడుతు న్నారు. దేవుడి గురించి, భక్తి గురించి, స్వర్గం గురించి, ఆధునిక మనిషి భక్తి గురించి వివరంగా చెప్తున్నారు. అందరూ నిశ్శబ్దంగా వింటున్నారు. వారిలో ఓ తత్వ జ్ఞాని కూడా ఉన్నారు. ఆయన ఇంకెవరో కాదు, ఉపన్యసిస్తున్న వ్యక్తి మిత్రుడే. దాదాపు రెండు గంటల తర్వాత ఉపన్యాసం ముగిసింది. ప్రవచనకర్త వేదిక మీద నుంచి దిగి తిన్నగా తన మిత్రుడైన జ్ఞాని వద్దకు వచ్చాడు. "ఎలా ఉందంటారు నా ప్రవచనం?" అని అడిగాడు పెద్దాయన.

దానికి జ్ఞాని జవాబిస్తూ "అంతా బాగానే ఉంది కానీ ఎందుకో ఒకదానికొకటి సంబంధం లేకుండా ఉందనిపిస్తోంది" అని అన్నాడు.

"నేనేం తప్పు మాట్లాడాను?" అని పెద్దాయన అడిగాడు.

"దేవుడిని నమ్మినవాడు స్వర్గానికి పోతాడన్నావు. అలాగే మంచిగా ఉత్తమంగా బతికే అతనూ స్వర్గానికి పోతాడు అన్నావు కదా!" అన్నాడు జ్ఞాని.

"అవును చెప్పాను. కానీ ఇందులో తేడా ఏముంది అని పెద్దాయన అడిగాడు.

ఇక్కడ ఒకడు అన్ని తప్పులు చేసి దేవుడిని నమ్మితే అతను స్వర్గానికి పోతాడా.... లేక ఒక్క తప్పూ కూడా చేయకుండా మంచిగా జీవిస్తూ దేవుడిని నమ్మకున్నా అతను కూడా స్వర్గానికి పోతాడా....దేవుడిని నమ్మనివాడు నరకానికి పోతాడా... దేవుడంటే నమ్మకమున్న దొంగ పరిస్థితి ఏమిటీ అని అడిగాడు జ్ఞాని.