దివ్యక్షేత్రం ద్వారకా తిరుమల'

భారతదేశంలోనే కాదు ప్రపంచవ్యాప్తంగా ఎక్కడ భారతీయులు స్థిరపడ్డారో అక్కడ మరో హిందూ దేవీ దేవత ఆలయం లేకున్నా కలియుగ దైవం శ్రీ వేంకటేశ్వరుని ఆలయం తప్పక కనబడుతుంది.

- ఇలపావులూరి వెంకటేశ్వర్లు

భారతదేశంలోనే కాదు ప్రపంచవ్యాప్తంగా ఎక్కడ భారతీయులు స్థిరపడ్డారో అక్కడ మరో హిందూ దేవీ దేవత ఆలయం లేకున్నా కలియుగ దైవం శ్రీ వేంకటేశ్వరుని ఆలయం తప్పక కనబడుతుంది. ఏడు కొండల మీద యుగాల కిందట కొలువైన శ్రీవారి పట్ల భారతీయులకు గల భక్తిప్రపత్తులకు నిదర్శనంగా చెప్పుకోవచ్చు.

విదేశాలలోనే కాదు మన దేశంలో కూడా ఎన్నో శ్రీ బాలాజీ ఆలయాలు నెలకొని ఉన్నాయి. ఆంధ్రప్రదేశ్లో పెద్ద తిరుపతితో పాటు చిన్న తిరుపతి కూడా ఉన్నది. పశ్చిమ గోదావరి(ప్రస్తుత ఏలూరు జిల్లా)లో ఉన్న ద్వారకా తిరుమల పుణ్యక్షేత్రం యుగ యుగాల నుండి 'చిన్న తిరుపతి'గా ప్రసిద్ధి చెంది పిలువబడుతోంది. ఎన్నో విశేషాల నిలయమైన ద్వారకా తిరుమల త్రేతాయుగానికి ముందు నుండి ఉన్నది. అని క్షేత్ర పురాణ గాథ తెలుపుతున్నది.

క్షేత్ర గాథ

కృత యుగంలో ద్వారక మహర్షి శ్రీ మహావిష్ణువు దర్శనాన్ని అపేక్షిస్తూ వందల సంవత్సరాలు తపస్సు చేశారట. ఎత్తైన చీమల పుట్టలు ఆయన చుట్టూ ఏర్పడినాయట. మహర్షి దీక్ష, భక్తిప్రపత్తులకు సంతసించిన వైకుంఠవాసుడు నిజరూప దర్శనమిచ్చారట. ద్వారకా మహర్షి శ్రీరామచంద్రుని తాత అయిన శ్రీ అజ మహారాజు ఈ క్షేత్రంలో శ్రీనివాసుని సేవించారని బ్రహ్మపురాణ పేర్కొన్నట్లు తెలుస్తోంది.

కానీ స్వామి వాల్మీకం పైన సాక్షాత్కరించినందున నడుము కింది భాగం శ్రీ ద్వారక మహర్షికి అ పాదసేవ నిమిత్తం అనీ; పై భాగం సాధారణ భక్తుల దర్శనార్థం కోసం అంటారు.

వైష్ణవ క్షేత్రాలలో పెరుమాళ్ల పాద దర్శనానికి విశేష ప్రాముఖ్యం ఉన్నది.తొలినాళ్లలో ఆ పాద దర్శనం భక్తులకు లభించేది కాదని చెబుతారు. పదకొండవ శతాబ్దానికి చెందిన శ్రీ వైష్ణవ ఆచార్యులు విశిష్టాద్వైత సిద్ధాంత కర్త అయిన రామానుచార్యులు ద్వారకా తిరుమల క్షేత్రాన్ని సందర్శించారట. ఆయన అక్కడి వారికి పరమాత్మ పాద దర్శన ప్రాధాన్యతను వివరించి మరో అర్చనా మూర్తిని స్వయంవ్యక్త రూపం వెనుక ప్రతిష్టించారని తెలుస్తోంది. అలా భక్తులకు శ్రీనివాసుని రెండు రూపాల, పాద దర్శనం లభ్యమవుతోంది.