కన్నీటి బిందువు ఆకారంలో శ్రీలంక

భారతదేశానికి దక్షిణాన హిందూ మహాసముద్రంలో  నెలకొని ఉన్న చిన్న ద్వీప దేశం శ్రీలంక.

- -షేక్ అబ్దుల్ హకీం జాని

భారతదేశానికి దక్షిణాన హిందూ మహాసముద్రంలో  నెలకొని ఉన్న చిన్న ద్వీప దేశం శ్రీలంక. పాక్ జలసంధి, గల్ఫ్ ఆఫ్ మున్నార్ ద్వారా ఏర్పడిన ఇరుకైన సముద్రం ద్వారా శ్రీలంక భారతదేశం నుండి వేరుచేయబడింది. ఒకప్పుడు దీన్ని సిలోన్, సింహళదేశం అని పిలిచేవారు. తన సహజ సౌందర్యం, సముద్ర జలాల మధ్య ఉండటం వల్ల 'హిందూ మహాసముద్రం యొక్క ముత్యం' అని సార్థక నామమేర్పడింది..భారతదేశం, మాల్దీవులతో అంతర్జాతీయ నీటి సరిహద్దులను పంచుకున్న శ్రీలంక ఆసియాలోని ఒక ద్వీప దేశం. ఇక్కడ అందమైన బీచ్లతో పాటు పర్యాటకుల్ని విశేషంగా ఆకర్షించే పర్యాటక ప్రదేశాలు చాలా ఉన్నాయి. ప్రపంచంలో అత్యంత అందమైన ద్వీప దేశాల్లో ఒకటైన శ్రీలంక అద్భుతమైన బీచ్లు రమ్య మనోహరమైన ప్రకృతి దృశ్యాలు,

అందమైన జలపాతాలు, పచ్చని అడవులకు నెలవై, రామాయణ గాథలతో ముడిపడి ఉంది. దీంతో శ్రీలంక భారతీయుల హృదయాలను సైతం తాకింది. అది మన పొరుగు దేశమే కావడంతో చాలా మంది పర్యాటకులు వెళ్లడానికి ఆసక్తి చూపుతుంటారు.సూర్యాస్తమయం సమయాలలో రమణీయ ప్రకృతిని పర్యాటకులు ఆస్వాదించి ప్రశాంతత పొందుతారు.'ప్రపంచంలోని అత్యుత్తమ దీవులలో శ్రీలంక కూడా ఒకటి' అని మార్కోపోలో పేర్కొన్నారు. సుదీర్ఘ చరిత్ర కలిగిన చిన్న దేశమైనప్పటికీ, అక్కడ ఆస్వాదించడానికి చాలా ప్రకృతి సౌందర్యంలో ఇమిడిపోయిన పర్యాటక ప్రదేశాలు ఉన్నాయి. శ్రీలంకలోని దాదాపు ఎనిమిది పర్యాటక ప్రదేశాలను యునెస్కోవారు ప్రపంచ వారసత్వ సంపదగా గుర్తించడం విశేషం. వీటిని తిలకించడానికి ప్రపంచ పర్యాటకులు అనునిత్యం ఇక్కడికి వస్తుంటారు.

కొలంబో