உலகளவில் அதிகரித்துவிட்ட விமான விபத்துகள்...

அதிக பாதிப்புகளை ஏற்படுத்தும் விமான விபத்துகள் தொடர்ச்சியாக நடப்பதன் காரணமாக, விமான விபத்துகள் அடிக்கடி நடப்பதாக சில சமூக ஊடக பயனர்கள் கூறுகின்றனர்.

- 

முன்னதாக, 29 டிசம்பர் 2024 அன்று, தென்கொரியாவில் ஜெஜு ஏர் விமானம் தரையிறங்கும்போது விபத்துக்குள்ளானதில் 179 பேர் இறந்தனர். ஒரு மாதம் கழித்து, வாஷிங்டன் டிசியில் ராணுவ ஹெலிகாப்டரும் பயணிகள் விமானமும் மோதியதில் 67 பேர் பலியாகினர்.

மிகச் சமீபத்தில், ஆமதாபாத் ஏர் இந்தியா விமானம் புறப்பட்ட சிறிது நேரத்தில் விபத்துக்குள்ளானது. இதில், விமானத்தில் இருந்த 261 பேரில் ஒருவரைத் தவிர அனைவரும் உயிரிழந்தனர்.

இதுகுறித்து குறைவான கருத்துக் கணிப்புகளே மேற்கொள்ளப்பட்டாலும், பிப்ரவரி மாதத்தில் ஏபி செய்தி முகமை நடத்திய கணக்கெடுப்பு, இணையதளத்தில் தோன்றும் விமான விபத்துகளின் திடுக்கிடும் படங்கள், சில அமெரிக்க மக்கள் மத்தியில் விமானப் பயணங்கள் மீதான நம்பிக்கையைப் பாதித்து இருப்பதாகக் கூறுகிறது.

ஆனால், பிபிசி வெரிஃபை, அமெரிக்காவிலும் உலகளவிலும் உள்ள தரவுகளை ஆய்வு செய்து, கடந்த 20 ஆண்டுகளாக விமான விபத்துகள் குறைந்து வருவதைக் கண்டறிந்துள்ளது.

அமெரிக்காவைப் பொறுத்தவரை, தேசிய போக்குவரத்துப் பாதுகாப்பு வாரியம் (NTSB) இந்த ஆண்டு ஜனவரி இறுதி வரை நிகழ்ந்த விமான விபத்துகள் குறித்த புள்ளிவிவரங்களைத் தொகுத்துள்ளது.

கடந்த 2005 முதல் 2024 வரை அமெரிக்காவில் விமான விபத்துகள் சராசரியாகக் குறைந்துள்ளன. ஆனால் இந்தக் காலகட்டத்தில் விமானங்களின் எண்ணிக்கை கணிசமாக அதிகரித்துள்ளது என்பதை இந்தத் தரவுகள் வெளிப்படுத்துகின்றன.

கடந்த ஜனவரியில் 52 விபத்துகள் பதிவாகின. இது கடந்த ஆண்டு ஜனவரியில் 58 ஆகவும், 2023 ஜனவரியில் 70 ஆகவும் இருந்தது. அதைவிட 2025இல் ஏற்பட்ட விமான விபத்துகளின் எண்ணிக்கை குறைவு என்பதை தேசிய போக்குவரத்துப் பாதுகாப்பு வாரியத்தின் (NTSB) தரவுகள் சுட்டிக்காட்டுகின்றன.

ஐ.நா.வைச் சார்ந்த அமைப்பான சர்வதேச விமானப் போக்குவரத்து அமைப்பு (ICAO), உலகளாவிய விமான சம்பவங்களைக் கண்காணிக்கிறது.

கடந்த 2005 முதல் 2023 வரை, ஒரு மில்லியன் விமானப் பயணங்களுக்கு எதிரான விபத்துகளின் எண்ணிக்கை தெளிவாகக் குறைந்துள்ளது என்று இதன் தரவுகள் காட்டுகின்றன.