டெஸ்ட் தொடரை கைப்பற்றும் முனைப்புடன் களமிறங்கும் இலங்கை, பங்களாதேஷ் அணிகள்

கொழும்பு எஸ்.எஸ்.சி. யில் இன்று 2 ஆவது டெஸ்ட் ஆரம்பம்

- நெவில் அன்தனி

பங்களாதேஷுக்கு எதிராக கொழும்பு எஸ்.எஸ்.சி. விளையாட்டரங்கில் இன்று புதன்கிழமை (25) ஆரம்பமாகவுள்ள இரண்டாவது டெஸ்ட் கிரிக்கெட் போட்டியில் வெற்றிபெற்று தொடரைக் கைப்பற்றும் முனைப்புடன் இலங்கை அணி களமிறங்கவுள்ளது.

இந்தப் போட்டிக்கான இலங்கை அணியில் இரண்டு அல்லது மூன்று மாற்றங்கள் இடம்பெற வாய்ப்புள்ளது.

காலி விளையாட்டரங்கில் நடைபெற்ற பங்களாதேஷுடனான முதலாவது போட்டியுடன் டெஸ்ட் கிரிக்கெட்டிலிருந்து விடைபெற்ற முன்னாள் அணித் தலைவர் ஏஞ்சலோ மெத்யூஸுக்குப் பதிலாக துனித் வெல்லாலகே, பசிந்து சூரியபண்டார, சோனால் தினூஷ ஆகிய மூவரில் ஒருவரும் உபாதைக்குள்ளான வேகபந்துவீச்சாளர் மிலன் ரத்நாயக்கவுக்கு பதிலாக அணிக்கு மீளழைக்கப்பட்ட விஷ்வா பெர்னாண்டோவும் இறுதி அணியில் இணைத்துக்கொள்ளப்படுவார்கள் என எதிர்பார்க்கப்படுகிறது.

துடுப்பாட்ட வரிசையில் அஞ்சலோ மெத்யூஸின் நான்காம் இடத்துக்கு கமிந்து மெண்டிஸ் தரம் உயர்த்தப்படுவார் என கருதப்படுகிறது. அல்லது புதிய வீரர் ஒருவர் அந்த இடத்தை நிரப்ப வாய்ப்பு உள்ளது.