விடுவிக்கப்பட்ட323 கொள்கலன்களிலும் சந்தேகத்திற்குரிய எதுவும் இருக்கவில்லை

கொழும்பு துறைமுகத்திலிருந்து விடுவிக்கப்பட்ட 323 கேள்விக்குரிய கொள்கலன்களில் சட்டவிரோதமான அல்லது சந்தேகத்திற்குரிய எதுவும் காணப்படவில்லை எனவும் இறக்குமதி குறிப்புகளில் உள்ள அனைத்து ஆவணங்களையும் சரிபார்த்த பிறகே கொள்கலன்களை வெளியிட நடவடிக்கை எடுக்கப்பட்டதாகவும் இலங்கை சுங்கத் திணைக்களத்தின் மேலதிக பணிப்பாளர் நாயகம் சீவலி அருக்கோட தெரிவித்துள்ளார்.

- க.பிரசன்னா

சட்டவிரோதமாக 323 கொள்கலன் விடுவிக்கப்பட்டதாக வெளியான தகவல்கள் தொடர்பில் ஊடகங்களுக்கு கருத்து வெளியிடுகையிலேயே இவ்வாறு தெரிவித்த அவர், கொள்கலன்கள் பெரும்பாலும் இந்தியா மற்றும் சீனாவிலிருந்து இறக்குமதி செய்யப்பட்டதாகவும் தெரிவித்தார்.

இந்த இறக்குமதி செய்யப்பட்ட கொள்கலன்களில் தொழிற்சாலைகளுக்குத் தேவையான மூலப்பொருட்கள், பிளாஸ்டிக், நூல், இரசாயனங்கள், ஆட்டோமொபைல் உதிரி பாகங்கள், கால்நடை தீவனம், இயந்திரங்கள், பூச்சிக்கொல்லிகள், சிமெந்து, இரும்பு குழாய்கள், உரங்கள் மற்றும் மரம் ஆகியவை இருந்ததாகவும் குறிப்பிட்டார்.