சமூகத் தேவைகளுக்கு அறிவியல் தீர்வு

தொழில்நுட்பத் திறனையும் சமூகச் சிந்தனையையும் இணைத்து மக்களுக்கு நன்மை பயக்க விரும்புகிறார் 'கவ்டெக்' அறிவார்ந்த தேசம் உபகாரச் சம்பளம் (Smart Nation Scholarship (GovTech)) பெற்ற சிவா ஆதர்ஷ், 23.

- ரவி சிங்காரம்

ஆகஸ்ட் 12ஆம் தேதி நடைபெற்ற தகவல், மின்னிலக்க மேம்பாட்டு அமைச்சின் குடும்ப உபகாரச் சம்பள விருது விழாவில், சிங்கப்பூரின் தொழில்நுட்ப, ஊடக, தகவல் துறைகளில் 81 பேருக்கு உபகாரச் சம்பளம் வழங்கப்பட்டது.

குடியிருப்பாளர்ச் சந்திப்புகளில் (Meet-the-People sessions), கடந்த மூன்று ஆண்டுகளாகப் பலரின் கோரிக்கைகளுக்குச் செவிசாய்த்து, வெவ்வேறு அமைப்புகளுக்கு மனு எழுதி உதவி வருகிறார் சிவா ஆதர்ஷ்.

குடும்பங்கள் பிரச்சினைகளுக்கு உள்ளாகும்போது அவற்றுக்கு அரசாங்கம் பல்வேறு வழிகளில் உதவினாலும், முன்கூட்டியே உதவியை நல்க முடியுமா என்று தரவு அறிவியல், இயந்திரக் கற்றல் வழி அவர் விடை காண விழைகிறார்.

ஒருவரின் கல்வி, வேலை, குடும்பப் பின்னணி சார்ந்த தரவுகளைச் சேகரித்து, அத்தகையோரிடத்தில் பொதுவாகக் காணப்படும் கூறுகளுடன் ஒப்பிட்டு, தேவைப்படும் உதவியை அடையாளம் காணலாம் என்றார் அவர்.

தமிழ் சார்ந்த சமூக நிகழ்ச்சிகளில் அதிகம் நாட்டம் கொண்ட தமது தாயாரின் வழியில், சமூக மன்ற இந்தியர் நற்பணிச் செயற்குழு உறுப்பினராகவும் இந்த இளையர் தொண்டாற்றுகிறார்.