પ્રોપર્ટી ટેક્સની વસૂલાત માટે AMC આક્રમક શહેરના તમામ ઝોનમાં મેગા સીલિંગ ડ્રાઈવ’

પૂર્વ ઝોનમાં ૮,૬૮૮, ઉત્તર ઝોતમાં ૩,૧૬૦ અને દક્ષિણ ઝોતમાં ૨,૮૨૨ મિલકતો સાગમટે સીલ કરી દેવાઈ: કરોડોના બાકી ટેક્સની વસૂલાત

- 

ફેબ્રુઆરી મહિનો અડધો પૂરો થઈ ગયો છે અને માર્ચ મહિનો નજીક આવી રહ્યો છે ત્યારે પ્રોપર્ટી ટેક્સની વસૂલાત માટે અમદાવાદ મ્યુનિસિપલ કોર્પોરેશન (એએમસી)ના સત્તાધીશો હવે ભારે આક્રમક બન્યા છે અને શહેરના તમામ સાતેય ઝોનના ૪૮ વોર્ડમાં ‘મેગા સીલિંગ ડ્રાઈવ' હાથ ધરવામાં આવી રહી છે.

બાકી પ્રોપર્ટી ટેક્સની વસૂલાત માટે મ્યુનિસિપલ પ્રોપર્ટી ટેક્સ વિભાગ ભારે આક્રમકતાથી મોટી રકમના ડિફોલ્ટર્સની રેસિડેન્શિયલ અને કોમર્શિયલ મિલકતોને તાળાં મારી રહ્યો છે. શહેરમાં દર શુક્રવારે ‘મેગા ટ્રિગર ઈવેન્ટ'નું આયોજન કરીને મ્યુનિસિપલ તંત્ર ડિફોલ્ટર્સ પર કાયદાકીય ભીંસ વધારી રહ્યું છે. વર્ષોથી પ્રોપર્ટી ટેક્સ નહીં ભરનારા ટેક્સ ડિફોલ્ટર્સ સામે સીલિંગ ઝુંબેશ ઉપરાંત આવી મિલકતોનાં પાણી અને ગટરનાં કનેક્શન કાપવા સુધીની આકરી કાર્યવાહી પણ કરવામાં આવી રહી છે.