ஆதிதிராவிட மாணவர்களுக்கு பள்ளி, கல்லூரி படிப்புகள் அனைத்தும் இலவசமாக செயல்படுத்த அரசு முடிவு

அமைச்சர் சாய் ஜெ.சரவணன் குமார் சட்டசபையில் பெருமிதம்

- 

புதுச்சேரி சட்டசபையில் மானிய மீதான கோரிக்கை விவாதத்திற்கு ஆதிதிராவிடர் மற்றும் பழங்குடியினர் நலத்துறை அமைச்சர் சாய் ஜெ. சரவணன்குமார் பதில் அளித்து பேசியதாவது, ஆதிதிராவிடர் நலத்துறையில் செயல்படுத்தப்படும் அனைத்து திட்டங்களில் பயன்பெற வருமான உச்சவரம்பு ரூ.8 லட்சமாக உயர்த்தப்பட்டு ஆணை பிறப்பிக்கப்பட்டுள்ளது.

மின்சக்தி மூலம் ஆட்டோ ஓட்ட உரிமம் பெற்ற பெண் ஆட்டோ ஓட்டுநர்களுக்கு மின் ஆட்டோ வாங்க மானியம் வழங்க வரவு திட்டம் தயாரிக்கப்பட்டு அரசு ஒப்புதலுக்கு அனுப்பி உள்ளோம். இது விரைவில் அமலுக்கு வரும். பள்ளர்கள், சக்கிலியர்கள் சமூகத்தினரின் கோரிக்கையை ஏற்று தேவேந்திர குல வேளாளர், அருந்ததியர் என பெயர் மாற்றம் செய்து அரசாணை வெளியிடப்பட்டுள்ளது.

அம்பேத்கர் தொடர்புடைய இந்தியாவில் 4 தலங்களுக்கு ஆண்டுதோறும் செல்ல அம்பேத்கர் யாத்ரா அரசு ஒப்புதலுக்கு அனுப்பப்பட்டுள்ளது. விரைவில் அமலுக்கு வரும். ஆதி திராவிடர் மற்றும் பழங்குடியினர் இறந்தால் இறுதி சடங்கிற்காள நிதி உதவி ரூ.15 ஆயிரத்தை ரூ.25 ஆயிரமாக உயர்த்தி வழங்கப்பட்டு வருகிறது.