Kunstenaar vertel van die skildery vir premier Alan Winde

Danksy die skildertalent van lede van die Suid-Afrikaanse Vereniging van Monden Voetskilders (MVSV), Patrick Botto en Anton van den Berg, kon die Wes-Kaapse premier, Alan Winde, na verlede week se besoek aan George, twee pragtige skilderye saam met hom terugneem Kaapstad toe.

- Eugene Gunning

Die skilderye is op 25 Februarie by die Conville-burgersentrum, waar Winde sy provinsiale rede gelewer het, aan hom oorhandig.

'n Skildery van nog 'n lid, Johan Erasmus, is later aan Browen Johnson, George se burgemeester, oorhandig.

Botto en Van den Berg se skilderye is van een van die bekendste bakens in Suid-Afrika, die Kaaimansrivierbrug met 'n trein. Dit is met 'n verfkwas in die mond geskilder.

Botto het aan George Herald vertel dat hy vroeg in Desember genader is om die skildery vir Winde te maak. Terwyl hy gewag het vir die nodige toestemming van die MVSV het hy al voorbereidings begin tref.

"Ek het 'n foto van 'n trein op die brug gesien wat met my gesels het. Ek het onmiddellik geweet dis die regte een."