மதித்தல்... கேட்டல்... செயல்படல்!

ம்முடைய அன்றாட வாழ்வைக் கவனிப்போம். நாம் சக மனிதரை முதலில் மதிக்கிறோமா? அவர் என்ன நினைக்கிறார் என்பதை அவர் சொல்லவரும்போது காது கொடுத்துக் கேட்கிறோமா?

- சூ. குழந்தைசாமி

அவருடைய உருவம், நிறம், ஜாதி, மதம், கட்சி, பணபலம், நபர் பலம், கௌரவம், புகழ் போன்ற அடையாளங்களை வைத்து மட்டுமே அவரை அணுகுகிறோமே தவிர, அவர் சொல்வதை முழுமையாகக் கேட்பதில்லை. அலட்சியம் காட்டி, குறுக்கிட்டுப் பேசி, அவரைச் சீர்குலைக்கப் பார்க்கிறோம். இதன்மூலம் அவரைவிட நாம் ஒரு படி பெரியவர் என்ற நிலைப்பாட்டை உறுதி செய்ய முயல்கிறோம். 'நான் சொல்வதே சரி' என்று ஆணவம் கொண்டு பேச முயல்கிறோமே தவிர, பணிவுடன் அனுமதி பெற்றுப் பிறரிடம் பேச முயல்வதில்லையே.

இரண்டு பேருக்குள் ஒரு பிரச்னை என்றால், மூன்றாம் நபரிடம் சொல்லித் தீர்த்துக் கொள்ள வேண்டும் என்ற ஓர் இயலாமையும, சுய இரக்கமும் நம்மிடம் குடிகொண்டிருக்கின்றன. நமக்குள் இருக்கும் சுய ஆளுமையுடனும் நம்பகத்தன்மையுடனும் இருவருக்குள்ளேயே பேசித் தீர்த்துக் கொள்ள முடியும் என்ற நம்பிக்கை நமக்கு வருவதில்லை.

இன்னொரு மிக மோசமான பழக்கம் நம்மிடம் உள்ளது. அது ஒருவரைப் பற்றிய தவறான வதந்திகளைப் பரப்புதல். வதந்திகளைக் கேட்க விரும்புதல், மற்றவர்களுடைய வாழ்வின் ரகசியங்களை எல்லை தாண்டி அறிய விரும்புதல் ஆகியவை அதிகரிப்பதுதான் தொலைத்தொடர்பு சாதனங்கள் 'கிசுகிசு' செய்திகளைப் பரப்புவதற்குக் காரணமாய் அமைகின்றன.