புதியதொரு உலக முறைமை!

அமெரிக்க அதிபரின் வெள்ளை மாளிகையின் ஓவல் அலுவலகத்தில் கடந்த வெள்ளிக்கிழமை அதிபர் டொனால்ட் டிரம்ப், உக்ரைன் அதிபர் வொலோதிமீர் ஸெலென்ஸ்கி இடையே நடைபெற்ற பேச்சுவார்த்தை பாதியிலேயே முடிந்தது. இதுபோல இரு நாட்டு அதிபர்களின் சந்திப்பு எந்த ஒப்பந்தமும் கையொப்பமாகாமலும், கூட்டாக செய்தியாளர்களுக்குப் பேட்டி அளிக்காமலும் நிறைவடைந்தது. இதுவே முதல் முறை எனக் கூறப்படுகிறது.

- நா.குருசாமி

கடந்த 2022, பிப்ரவரி முதல் நடைபெற்று வரும் ரஷியா - உக்ரைன் இடையிலான போரை முடிவுக்குக் கொண்டு வரவும், இந்தப் போரில் உக்ரைனுக்கு இதுவரை அளித்த உதவிகளுக்கு கைம்மாறாக அந்த நாட்டின் அரிய கனிம வளங்களை வெட்டி எடுக்க அமெரிக்காவுக்கு அனுமதி வழங்க வகை செய்யும் ஒப்பந்தத்தில் கையொப்பமிடுவதற்கும் வெள்ளை மாளிகைக்கு வருமாறு ஸெலென்ஸ்கிக்கு டிரம்ப் அழைப்பு விடுத்தார்.

இதையேற்று, பேச்சுவார்த்தை நடத்த வெள்ளை மாளிகைக்கு கடந்த வெள்ளிக்கிழமை வருகை தந்தார் ஸெலென்ஸ்கி. இந்தப் பேச்சுவார்த்தை ஆரம்பத்தில் சுமுகமாகத்தான் நடைபெற்றது. உக்ரைனுக்கு அளித்த பெருமளவிலான நிதியுதவி, ராணுவத் தளவாடங்கள் உதவிகாக ஸெலென்ஸ்கி இதுவரை நன்றி தெரிவிக்கவில்லை என்றும், இந்தப் பேச்சுவார்த்தைக்கு சாதாரண உடை (பேன்ட் - டி ஷர்ட்) அணிந்து வந்து தங்களை அவமதித்துவிட்டதாகவும் அமெரிக்க துணை அதிபர் ஜே.டி. வான்ஸ் கடுமையாக விமர்சித்தபோது, பேச்சுவார்த்தை திசைமாறியது.

அமெரிக்கா செய்த உதவி களுக்காக ஏற்கெனவே பலமுறை நன்றி தெரிவித்துள்ளதாக ஸெலென்ஸ்கி சுட்டிக்காட்டியதை வான்ஸ் ஏற்கவில்லை. இந்தப் பேச்சுவார்த்தை தொடங்குவதற்கு முன்பாக அதிபர் டிரம்ப்பிடம் ஏன் நன்றி தெரிவிக்கவில்லை என வான்ஸ் மீண்டும் எழுப்பிய கேள்வி காரசார விவாதத்துக்கு வித்திட்டது.