கொள்ளை போகும் கனிம வளங்கள்!

செயற்கை மணலான எம்-சாண்ட் மற்றும் ஜல்லிக் கற்களின் திடீர் விலை உயர்வால் ரூ.5,000 கோடி மதிப்பிலான கட்டுமானப் பணிகள் பாதிக்கும் என்றும், விலையைக் கட்டுப்படுத்த அரசு நடவடிக்கை எடுக்காவிட்டால் போராட்டத்தில் ஈடுபடுவோம் என்றும் அரசு ஒப்பந்ததாரர்கள் அறிவித்துள்ளனர்.

- 

இந்த விலை ஏற்றம் அவர்களுக்கு மட்டும் அல்ல; கட்டுமானத் தொழிலில் ஈடுபட்டுள்ள தனியார் ஒப்பந்ததாரர்களுக்கும் பாதிப்பை ஏற்படுத்தும் என்பதோடு, சுமார் 20 லட்சத்துக்கும் மேற்பட்ட தொழிலாளர்களும் பாதிக்கப்படுவர்.

இயற்கையான ஆற்று மணல் வரைமுறை இல்லாமல் எடுக்கப்பட்டதால் தாமிரவருணி, காவிரி, கொள்ளிடம் உள்ளிட்ட ஆறுகளில் பெரும்பாலான மணல் குவாரிகள் உயர்நீதிமன்ற உத்தரவின்படி மூடப்பட்டன. அதன் பிறகு மணலுக்குத் தட்டுப்பாடு ஏற்பட்டது. மணலுக்கு மாற்றாக, மலை மற்றும் பூமிக்கடியில் உள்ள பாறைகளை வெட்டி எடுப்பதால் கிடைக்கும் கருங்கல்லை இயந்திரங்களில் அரைத்து எம்-சாண்ட் உற்பத்தி செய்யப்படுகிறது.

தமிழ்நாட்டுக்கு மட்டும் நாளொன்றுக்கு சுமார் 25 ஆயிரம் லாரி எம்-சாண்ட் தேவைப்படுகிறது. இதுபோக, கேரளம் மற்றும் கர்நாடகத்துக்கு செல்லும் சுமார் 5,000 லாரிகள் என மொத்தம் சுமார் 30 ஆயிரம் லாரி எம்-சாண்ட் இங்கு உற்பத்தி செய்யப்படுவதாக கட்டுமானத் துறையில் ஈடுபட்டுள்ளவர்கள் கூறுகின்றனர். இப்போது ஒரு லாரி எம்-சாண்டின் (4 யூனிட்கள்) விலை ரூ. 16 ஆயிரத்திலிருந்து ரூ. 20 ஆயிரத்துக்கும் அதிகமாக உயர்த்தப்பட்டுள்ளது.