சி-130ஜே சூப்பர் ஹெர்குலீஸ் விமான கூட்டுத் தயாரிப்பு மையம்: இந்தியாவில் அமைக்க அமெரிக்க நிறுவனம் திட்டம்

சி-130ஜே சூப்பர் ஹெர்குலீஸ் கனரக ராணுவப் போக்குவரத்து விமானங்களை தயாரிப்பதற்கான கூட்டுத் தயாரிப்பு மையத்தை இந்தியாவில் அமைக்க, அமெரிக்காவின் பாதுகாப்பு உற்பத்தி நிறுவனமான லாக்ஹீட் மார்டின் திட்டமிட்டுள்ளது.

- 

பல லட்சம் கோடி ரூபாய் மதிப்பில் சுமார் 80 ராணுவ போக்குவரத்து விமானங்களை கொள்முதல் செய்ய இந்திய விமானப்படை திட்டமிட்டுள்ளது. அந்தக் கொள்முதலுக்கு பாதுகாப்பு அமைச்சகத்தின் கீழ் செயல்படும் பாதுகாப்பு தளவாட கொள்முதல் கவுன்சில் (டிஏசி) அடுத்த சில வாரங்களில் ஒப்புதல் அளிக்க வாய்ப்புள்ளது.

அந்த விமானங்களை எங்கிருந்து கொள்முதல் செய்வது என்பதைக் கண்டறியும் முயற்சியை இந்திய விமானப்படை தொடங்கியுள்ள நிலையில், அந்தப் படைக்கு சி-130ஜே சூப்பர் ஹெர்குலீஸ் கனரக ராணுவ போக்குவரத்து விமானம் மிகவும் பயனுள்ளதாக இருக்கும் என்று லாக்ஹீட் மார்டின் பரிந்துரைத்துள்ளது.