பாகிஸ்தான் செயற்குழு': காங்கிரஸ் மீது பாஜக கடும் விமர்சனம்

காங்கிரஸ் செயற்குழுவை 'பாகிஸ்தான் செயற்குழு' என்று பாஜக கடுமையாக விமர்சித்தது.

- 

புது தில்லி, மே 3:

புல்வாமா பயங்கரவாதத் தாக்குதலுக்கு பதிலடியாக பாகிஸ்தான் பகுதியில் இந்திய விமானப்படை மேற்கொண்ட துல்லியத் தாக்குதலின் உண்மைத் தன்மை குறித்து காங்கிரஸ் மூத்த தலைவர் சரண்ஜித் சிங் சன்னி கேள்வி எழுப்பிய நிலையில், அக்கட்சி மீது பாஜக இந்த விமர்சனத்தை முன்வைத்தது.

ஜம்மு-காஷ்மீரின் பஹல்காமில் கடந்த ஏப்ரல் 22-ஆம் தேதி சுற்றுலாப் பயணிகள் மீது பயங்கரவாதிகள் நடத்திய தாக்குதலில் 26 பேர் கொல்லப்பட்டனர். இத்தாக்குதலில் எல்லை தாண்டிய பயங்கரவாத தொடர்புகள் உறுதி செய்யப்பட்ட நிலையில், பாகிஸ்தானுக்கு பாடம் புகட்ட உறுதியான-தெளிவான நடவடிக்கையை மேற்கொள்ள மத்திய அரசை வலியுறுத்தி காங்கிரஸ் செயற்குழு கடந்த வெள்ளிக்கிழமை தீர்மானம் நிறைவேற்றியது.

செயற்குழு கூட்டத்துக்குப் பின் செய்தியாளர்களிடம் பேசிய கட்சியின் மூத்த தலைவருமான பஞ்சாப் முன்னாள் முதல்வருமான சரண்ஜித் சிங் சன்னி, பாலாகோட் துல்லியத் தாக்குதலின் உண்மைத் தன்மை குறித்து கேள்வியெழுப்பினார்.