இந்திய பொருள்கள் மீது 27% வரி

அமெரிக்க அதிபர் டிரம்ப் அதிரடி

- 

நியூயார்க், வாஷிங்டன், ஏப். 3: இந்தியாவிலிருந்து இறக்குமதி செய்யப்படும் பொருள்கள் மீது அதன் விலையில் சராசரியாக 27 சதவீதம் அளவுக்கு இறக்குமதி வரி விதிக்கப்படும் என்று அமெரிக்க அதிபர் டொனால்ட் டிரம்ப் அறிவித்தார்.

அமெரிக்காவின் வெள்ளை மாளிகையில் இந்திய நேரப்படி வியாழக்கிழமை அதிகாலை நடைபெற்ற செய்தியாளர்கள் சந்திப்பில் 'அமெரிக்க பொருள்கள் வர்த்தகப் பற்றாக்குறைக்கு பங்களிக்கும் வர்த்தக நடைமுறைகளைச் சரிசெய்ய பரஸ்பர வரியுடன் இறக்குமதிகளை ஒழுங்குபடுத்துதல்' என்ற தலைப்பிலான இந்த பரஸ்பர வரிவிதிப்பு உத்தரவை அதிபர் டிரம்ப் வெளியிட்டார். அதனுடன், இந்தியா உள்பட அமெரிக்க பொருள்கள் மீது அதிக இறக்குமதி வரியை விதிக்கும் 25 நாடுகள் மீது அமெரிக்கா சார்பில் விதிக்கப்பட்டுள்ள பரஸ்பர வரி விதிப்பு அட்டவணையையும் டிரம்ப் வெளியிட்டார்.

இந்த அட்டவணையில் இந்தியாவுக்கு 26 சதவீத வரி என்று டிரம்ப் குறிப்பிட்டுள்ளபோதும், உண்மையில் இந்தியப் பொருள்கள் மீது சராசரியாக 27 சதவீத இறக்குமதி வரியை அமெரிக்கா விதித்துள்ளதாக இந்தியத் தரப்பில் தெரிவிக்கப்பட்டது.

இதில் அமெரிக்க பொருள்கள் மீது அதிகபட்சமாக 97 சதவீத இறக்குமதி வரி விதிக்கும் கம்போடியா நாட்டின் மீது 49 சதவீத இறக்குமதி வரியை அமெரிக்கா விதித்துள்ளது. இதற்கு அடுத்தபடியாக வியத்நாம் (90) மீது 46 சதவீதமும், இலங்கை (88) மீது 44 சதவீதமும் இறக்குமதி வரி விதிக்கப்பட்டுள்ளது.

அமெரிக்க பொருள்கள் மீது 67 சதவீத வரி விதிக்கும் சீனா மீது 34 சதவீத இறக்குமதி வரியை அமெரிக்கா விதித்துள்ளது. அமெரிக்க பொருள்கள் மீது 52 சதவீத வரி விதிக்கும் இந்தியா மீது 27 சதவீத வரி விதிக்கப்பட்டுள்ளது.