மியான்மர், தாய்லாந்தை உலுக்கிய நிலநடுக்கம்

மியான்மர் மற்றும் அதன் அண்டை நாடான தாய்லாந்தில் வெள்ளிக்கிழமை பிற்பகலில் சக்திவாய்ந்த நிலநடுக்கங்கள் ஏற்பட்டன.

- 

பாங்காக், மார்ச் 28:

இதில் கடும் பாதிப்பைச் சந்தித்த மியான்மரில் கட்டட இடிபாடுகளில் சிக்கி 144 பேர் உயிரிழந்துள்ளதாகவும், 730 பேர் காயமடைந்துள்ளதாகவும் அந் நாட்டு ராணுவ அரசு அறிவித்துள்ளது.

தாய்லாந்தின் தலைநகர் பாங்காக் மற்றும் அதைச் சுற்றிய பகுதிகளில் பல அடுக்குமாடி கட்டடங்கள் நிலநடுக்கத்தால் சரிந்துள்ளன. இதில் 90-க்கும் மேற்பட்டோர் மாயமாகியுள்ளதாகவும், 10 பேர் உயிரிழந்தது உறுதி செய்யப்பட்டுள்ளதாகவும் அதிகாரிகள் தெரிவித்தனர்.

மியான்மரின் இரண்டாவது பெரிய நகரமான மண்டலாயை மையமாகக்கொண்டு இந்த இரண்டு நிலநடுக்கங்களும் அடுத்தடுத்து நிகழ்ந்தன. அமெரிக்க புவியியல் ஆய்வு மைய புள்ளிவிவரங்களின் படி, சகாய்ங் நகரின் வடமேற்கே 16 கி.மீ. தொலைவில் காலை 11.50 மணியளவில் முதல் நிலநடுக்கம் ஏற்பட்டுள்ளது. இது ரிக்டர் அளவுகோலில் 7.7 அலகுகளாகப் பதிவானது. அதைத் தொடர்ந்து, வலுவான இரண்டாவது நிலநடுக்கம் ஏற்பட்டது. அது 6.4 புள்ளியாகப் பதிவானது எனத் தெரிவிக்கப்பட்டுள்ளது.

அடுத்தடுத்த நிலநடுக்கங்களைத் தொடர்ந்து தலைநகர் நேபிடா, மண்டலாய் உள்பட 6 மாகாணங்களில் அவசரநிலையை மியான்மரின் ராணுவ அரசு பிரகடனம் செய்தது.

‘நிலநடுக்கத்தால் மியான்மரின் பல பகுதிகளில் குறிப்பிடத்தக்க பாதிப்புகள் ஏற்பட்டுள்ளன. மண்டலாய் மற்றும் சகாய்ங் மாகாணங்களின் பல பகுதிகளில் மின் கம்பங்கள் சாய்ந்திருப்பதால், பாதிக்கப்பட்ட பகுதிகளுக்கு மீட்புப் படையினர் செல்வதில் சிக்கல் ஏற்பட்டுள்ளது.

மனிதாபிமான தேவைகள் தொடர்பான தகவல்கள் இன்னும் சேகரிக்கப்பட வேண்டியுள்ளது’ என்று செஞ்சிலுவை சங்க நிர்வாகிகள் தரப்பில் தெரிவிக்கப்பட்டது.