தமிழக மக்களை பிளவுபடுத்த முடியாது

தமிழக மக்களை மதத்தால் பிளவுபடுத்தும் பாஜகவின் முயற்சி எடுபடாது என்று முதல்வர் மு.க.ஸ்டாலின் தெரிவித்தார்.

- 

திருப்பத்தூர், ஜூன் 26:

திருப்பத்தூர் மாவட்டம், ஜோலார்பேட்டையை அடுத்த மண்டலவாடி பகுதியில் ரூ.517 கோடியில் புதிய பணிகளுக்கு அடிக்கல் நாட்டுதல், முடிவுற்ற பணிகளை மக்கள் பயன்பாட்டுக்கு திறந்து வைத்தல், நலத்திட்ட உதவிகள் வழங்குதல் உள்ளிட்ட நிகழ்ச்சிகள் வியாழக்கிழமை நடைபெற்றன.

திருப்பத்தூர் அருகே மண்டலவாடியில் நடைபெற்ற இந்த விழாவில் முதல்வர் மு.க.ஸ்டாலின் பேசியதாவது: திமுக அரசு செயல்படுத்திவரும் திட்டங்களைப் போல இதுவரை தமிழக வரலாற்றில் வேறு எவரும் செய்ததில்லை. தொடர்ந்து பல்வேறு நலத்திட்டங்களைச் செயல்படுத்தி வருகிறோம்.

வேலூர் மாவட்டத்தில் புதன்கிழமை நடைபெற்ற விழாவை முடித்துக் கொண்டு திருப்பத்தூர் மாவட்டத்துக்கு வருவதற்கு சுமார் ஆறு மணி நேரம் ஆனது. வழிநெடுகிலும் பொதுமக்களின் மகிழ்ச்சியைப் பார்த்துக் கொண்டு வந்தேன். அந்த வரவேற்பைப் பார்த்து பெருமையுடன் கூறுகிறேன், 2026 மட்டுமல்ல, 2031, 2036-லும் திமுக தான் தமிழ்நாட்டில் ஆட்சியமைக்கும்.