வாட்ஸ் கரையைப் பாதுகாப்போம்!

கோடிக்கணக்கான மக்கள் தங்களுடைய வாழ்வாதாரத்துக்கு இந்த வாட்ஸ் கரையையே சார்ந்திருக்கின்றனர். இந்தப் பகுதியில் எண்ணெய் மற்றும் எரிவாயுவை அகழ்ந்தெடுப்பது கார்ப்பரேட்டுகளுக்கு வேண்டுமானால் செழிப்பைக் கொடுக்கலாம்; ஆனால், சாதாரண மக்களுக்கு அது அழிவையே தரும்.

- சுப. உதயகுமாரன்

‘கரை’ என்ற சொல் புவியியலின் பல்வேறு துறைகளில் உள்ள பல்வேறு கட்டமைப்புகளைக் குறிக்கிறது. எடுத்துக்காட்டாக, லிம்னாலஜியில் (உள்நாட்டு நீர் பற்றிய ஆய்வு), கரை என்பது ஒரு நீரோடை அல்லது நதியின் படுகையை ஒட்டிய நிலப்பரப்பைக் குறிக்கிறது. நன்னீர் சூழலியலில், கரை என்பது கரையோர வாழ்விடங்களின் இருப்பிடத்தைக் குறிக்கிறது. கடற்பயணத்தில் இந்த சொல் ஒரு தடைத் தீவை அல்லது நீரில் மூழ்கியிருக்கும் பீடபூமியைக் குறிக்கிறது.

தடைத் தீவு என்பது மணலால் ஆன ஒரு நீண்ட குறுகிய தீவு. இது கடற்காயல் மற்றும் கடலுக்கு இடையில் ஒரு தடையை உருவாக்குகிறது. நீரில் மூழ்கிய பீடபூமி என்பது 200 மீட்டருக்கும் குறைவான ஆழத்தில் கடல் தளத்தில் அமைந்திருக்கும் தட்டையான மேட்டுப் பகுதி. கடலுக்குள் அமைந்திருக்கும் மலையின் உச்சி போன்ற பகுதி, அதைச் சுற்றியுள்ள பகுதியுடன் ஒப்பிடும்போது ஆழமற்ற கடற்பரப்பாகத் தோன்றும், இதைக் கடல் திட்டு என்றழைக்கிறோம்.

இப்படியாக, கரை என்பது மணல் மற்றும் பிற ஒருங்கிணைக்கப்படாத பொருள்களைக் கொண்ட, நீரில் மூழ்கிய முகடு, அல்லது கரை அல்லது பட்டை ஆகும். ஒரு நீர்நிலையின் படுகையிலிருந்து உயர்ந்து மேற்பரப்புக்கு அருகில் அல்லது அதற்கு மேலே நிற்கும் பகுதியைத்தான் கரை என்கிறோம்.

சுருக்கமாகச் சொல்வதென்றால், கரை என்பது நீருக்கடியில் உள்ள ஒரு நிலப்பரப்பு. இதை ஊட்டச்சத்து நிறைந்த நீரோட்டங்கள் தொடர்ந்து தழுவும் போது, அது ஒரு வளமான மீன்பிடிப் பகுதியாக மாறும். உலகில் இம்மாதிரியான இருபதுக்கும் மேற்பட்ட பெரிய கரைகள் உள்ளன. அவற்றில் நியூஃபவுண்ட்லேண்டின் கிராண்ட் பேங்க்ஸ் (2,80,000 சதுர கி.மீ.), அகுல்ஹாஸ் பேங்க் (1,16,000 சதுர கி.மீ.), டோகர் பேங்க் (17,600 சதுர கி.மீ.), கிளீவர் பேங்க் (1,235 சதுர கி.மீ.) போன்றவை குறிப்பிடத்தக்கவையாகும்.

டோகர் பேங்க் என்பது பிரிட்டனின் கிழக்கு கடற்கரையிலிருந்து சுமார் 100 கிலோமீட்டர் (55 கடல் மைல்) தொலைவில் வட கடலின் ஆழமற்ற பகுதியில் உள்ள ஒரு பெரிய மணல் திட்டாகும். இது காட் எனப்படும் பண்ணா மீன்களைப் பிடிக்கப் பயன்படுத்தப்பட்ட டச்சு மீன்பிடிப் படகுகளான ‘டாக்கர்ஸ்’ நினைவாகப் பெயரிடப்பட்டிருக்கிறது.