ரஷியாவிலிருந்து எண்ணெய் வாங்குவதை நிகழாண்டு இறுதிக்குள் இந்தியா நிறுத்திவிடும்?

'ரஷியாவிடமிருந்து கச்சா எண்ணெய் வாங்குவதை நிகழாண்டு இறுதிக்குள் பெரும்பாலும் நிறுத்திவிட இந்தியா ஒப்புக்கொண்டுள்ளது' என்று அமெரிக்க அதிபர் டொனால்ட் டிரம்ப் மீண்டும் தெரிவித்தார்.

- 

இருந்தபோதும், 'ரஷியாவிடமிருந்து கச்சா எண்ணெயை முழுமையாக நிறுத்தும் அளவுக்கு குறைப்பதற்கு இந்தியாவுக்கு சில காலம் ஆகும்' என்ற கருத்தையும் அவர் தெரிவித்தார்.

'சீனாவும் இதேபோன்ற நடவடிக்கையை மேற்கொள்வதற்கு வலியுறுத்த முயற்சிப்பேன்' என்றும் அவர் தெரிவித்தார்.

இருதரப்பு வர்த்தக ஒப்பந்தப் பேச்சுவார்த்தை இழுபறி மற்றும் ரஷியாவிடமிருந்து கச்சா எண்ணெய் வாங்குவது ஆகிய காரணங்களைக் காட்டி இந்தியாவிலிருந்து இறக்குமதி செய்யப்படும் பொருள்கள் மீது 50 சதவீத வரியை அமெரிக்கா விதித்தது. இதனால், இரு நாடுகளிடையேயான உறவில் சற்று பாதிப்பு ஏற்பட்டது. எனினும், இருதரப்பு வர்த்தக ஒப்பந்தப் பேச்சுவார்த்தை தொடர்ந்து நடைபெற்று வருகிறது.

இதனிடையே, ரஷியாவிடமிருந்து எண்ணெய் கொள்முதல் செய்வதை நிறுத்துவதாக பிரதமர் நரேந்திர மோடி தன்னிடம் உறுதி அளித்ததாக அமெரிக்க அதிபர் டிரம்ப் அண்மையில் தெரிவித்தார். அதை இந்தியா மறுத்தது.

அதைத் தொடர்ந்து, 'ரஷியாவிடம் இருந்து கச்சா எண்ணெய் வாங்குவதை இந்தியா தொடர்ந்தால், கூடுதல் வரியைச் செலுத்த வேண்டியிருக்கும். இந்தியப் பொருள்கள் மீது கூடுதலாக 50 சதவீத வரி விதிக்கப்படும்' என்று டிரம்ப் எச்சரிக்கை விடுத்தார்.