சபரிமலை கோயிலின் தங்க கதவை செம்பு என்று கூறி வெளியே கொண்டு சென்றது அம்பலம்

பரபரப்பு தகவல்கள் : துணை கமிஷனர் சஸ்பெண்ட்

- 

7 வருடங்களுக்கு முன் தங்கத் தகடுகள் பதிக்கப்பட்ட சபரிமலை கோயிலின் வாசல், நிலை ஆகியவற்றை செம்பு என்று கூறி கடந்த 2019ம் ஆண்டு பராமரிப்புப் பணிகளுக்காக சென்னைக்கு கொண்டு செல்லப்பட்டது. ஆனால் பின்னர் இவற்றுக்கு பதிலாக புதிய வாசல், நிலை பொருத்தப்பட்டது தற்போது தெரியவந்துள்ளது.

சபரிமலை ஐயப்பன் கோயிலில் பதிக்கப்பட்ட தங்கத் தகடுகள் மாயமான சம்பவத்தில் நாளுக்கு நாள் பரபரப்பு தகவல்கள் வெளியாகி வருகின்றன. சபரிமலையில் தங்கத் தகடுகள் பதிப்பதற்காக கடந்த 1998ம் ஆண்டு பிரபல பெங்களூரு தொழிலதிபர் விஜய் மல்லையா 30.300 கிலோ தங்கமும், 1900 கிலோ செம்பும் வழங்கினார்.

கோயிலின் மேற்கூரை, பக்கச் சுவர்களில் சில பகுதிகள், வாசல், நிலை, படிகள் மற்றும் முன்புறமுள்ள 2 துவாரபாலகர் சிலைகள் ஆகியவற்றில் தங்கத் தகடுகள் பதிக்கப்பட்டன. இது தொடர்பான அனைத்து ஆவணங்களும் திருவிதாங்கூர் தேவசம் போர்டு வசம் உள்ளன.