மூண்டுகிறதா மூன்றாம் உலகப்போர்?

ரான் - இஸ்ரேல் நாடுகளுக்கிடையே ஒரு வாரத்துக்குள் கடுமையான போர் மூண்டுள்ளது. இது குறித்து உலக நாடுகள் கவலை அடைந்துள்ளன. இதனால் மூன்றாம் உலகப்போர் மூள வாய்ப்பு உள்ளதா என்கிற கேள்வி எழுந்துள்ளது. விரிவான பார்வை இங்கே...

- 

அமெரிக்காவுடன் ஈரான் புதிய அணுசக்தி ஒப்பந்தம் செய்து கொள்ள வேண்டுமென அமெரிக்க அதிபர் டிரம்ப் சமீப காலமாக நெருக்கடி கொடுத்து வந்தார். இதுதொடர்பாக இரு நாடுகளும் 5 கட்ட பேச்சுவார்த்தை நடத்தி சுமூக முடிவு ஏற்படவில்லை. அதே சமயம் 2018ல் அணு சக்தி ஒப்பந்தத்தை டிரம்ப் ரத்து செய்த பிறகு ஈரான், அணு ஆயுத தயாரிப்பை நோக்கி யுரேனியத்தை அதிகளவு செறிவூட்டி வருகிறது. அந்த வகையில், அணு ஆயுதம் தயாரிக்க யுரேனியத்தை 90 சதவீதம் செறிவூட்ட வேண்டும். அந்த அளவினை ஈரான் நெருங்கி இருந்த நேரத்தில் ஒருவேளை அணு ஆயுதம் தயாரிக்கப்பட்டுவிட்டால் அது இஸ்ரேலை அழிக்கும் முயற்சி என இஸ்ரேல் கருதியது.

ஆபரேஷன் ஸ்டார்ட்: இதையடுத்து கடந்த ஜூன் 12ம் தேதி இஸ்ரேல் பாதுகாப்புப் படைகள், ஈரான் தலைநகர் டெஹ்ரான் மாவட்டம் 18ல் உள்ள மக்களை வெளியேறுமாறு கூறியது. பின்னர், ஜூன் 13ம் தேதி அதிகாலை 3 மணியளவில், டெஹ்ரானுக்கு தெற்கே சுமார் 225 கி.மீ (140 மைல்) தொலைவில் உள்ள நடான்ஸ் அணுசக்தி நிலையத்தை இஸ்ரேல் குறிவைத்து தாக்குதல் நடத்தியது. ஆபரேஷன் ரைசிங் லயன் என்று அழைக்கப்பட்ட இந்தத் தாக்குதல் ஈரானின் அணுசக்தித் திட்டத்தினை குறிவைத்து நடத்தப்பட்டதாக இஸ்ரேல் பிரதமர் பெஞ்சமின் நெதன்யாகு கூறினார். இந்த தாக்குதலில் ஈரானின் ராணுவ அதிகாரிகள், அணு விஞ்ஞானிகள் மேலும் முக்கியத் தலைவர்கள் கொல்லப்பட்டனர்.

ஈரானும் பதிலடி: இஸ்ரேல் தாக்குதலுக்கு ஈரானும் 100 டிரோன்கள் மூலம் பதிலடி தாக்குதல் கொடுத்தது. சில மணி நேரங்களுக்குப் பிறகு, இஸ்ரேலில் உள்ள பல்வேறு இடங்கள், ராணுவ மையங்கள் மற்றும் விமான தளங்கள் மீது பாலிஸ்டிக் ஏவுகணைத் தாக்குதல்களை நடத்தி, ஈரான் தனது பதிலடியைத் தொடங்கியது. இந்தத் தாக்குதலுக்கு ஈரான் 'ட்ரூ ப்ராமிஸ் 3' என பெயர் வைத்திருந்தது. இப்படியாக பதிலுக்கு பதில் தாக்குதல்கள் தொடர்கின்றன.

ஏற்கனவே இஸ்ரேல் - காசா இடையே தாக்குதல் நடந்து சற்று ஓய்ந்துள்ளது. முன்பாக உக்ரைன் - ரஷ்யா இடையே மூன்று ஆண்டுகளுக்கு மேலாக தாக்குதல்கள் நடைபெற்று வந்து அதுவும் சற்றே அமைதியாகி உள்ளது. திடீரென இஸ்ரேல், ஈரான் மீது தாக்குதல் நடத்துவதற்கு என்ன காரணம் என்று கேள்வி எழும்.