வானிலிருந்து விழும் தங்கத் துண்டுகள்

மகாராஷ்டிரா மாநிலம் புனே நகருக்கு சிறிது தூரத்தில் இயற்கை எழிலுடன் அமைந்துள்ள 'காட் கோட்' மலை உச்சியில் கோயில் கொண்டிருக்கும் கடவுளுக்கு கண்டோபா என்று பெயர். சிவபெருமானின் 64 தோற்றங்களில் இவரும் ஒருவர் என்று நம்பப்படுகிறது. இந்த மலைக் கோயிலுக்குச் செல்ல ஜெஜிரி என்ற இடத்திலிருந்து புறப்பட வேண்டும். 450 படிக்கட்டுகள் கொண்ட கரடுமுரடான பாதையில் கஷ்டப்பட்டு ஏறிச் செல்ல வேண்டும். பூஜைக்கு வேண்டிய "பாந்த்ரா" என்ற மஞ்சள்பொடி, தேங்காய் போன்ற பொருட்களை மலையடிவாரத்திலிருந்துதான் வாங்கிச் செல்ல வேண்டும்.

- 

மலை ஏறிச் செல்லும்போது அழகிய சிற்ப வேலைப்பாடுகள் கொண்ட அலங்கார வளைவுகளும், பாதையின் இருபுறமும் "தீபமாலா" என்ற சிற்பக் கலை சிறக்கும் அடுக்கு கல்யாண தூண் விளக்குகளும் வழிகாட்டியாக நம்மை வரவேற்கின்றன. மேலும் சிறிது தூரம் ஏறிச் சென்றால் தீப மாலா கற்சிலை விளக்குகளால் சூழ, கண்டோபா கோயிலைக் காணலாம்.

இக்கோயிலுக்குள் கண்டோபாவும் (சிவபெருமான்) அவரது மனைவி மால்ஷாபாயும் (பார்வதி) சிலைவடிவாகக் காட்சியளிக்கின்றனர். பக்தர்கள் இந்த இரு தெய்வங்களின் அருகில் சென்று அவர்களைத் தொட்டு மஞ்சள் பொடி (பாந்த்ரா) அபிஷேகம் செய்து, கை கூப்பி வணங்கி தங்கள் குறைகளையும், கஷ்டங்களையும் கூறி நன்மை கிடைக்க மனப்பூர்வமாக பிரார்த்திக்கிறார்கள்.