மனதை வென்ற கலை செல்வம் ரவிச்சந்திரன்

சினிமாவில் ஒவ்வொரு காலகட்டத்திலும் முன்னணி நடிகர்களுக்கு சவால் விடும் வகையில் புதுமுக நடிகர்கள் வருவது வழக்கம். சிவாஜி, எம்ஜிஆர் காலத்தில் ஜெமினிகணேசன், ஜெய்சங்கர் போன்ற நடிகர்களும் வளர்ந்து வந்தார்கள். பிறகு ரஜினி, கமல் காலத்தில் விஜய், அஜித் போன்ற நடிகர்கள் வளர்ந்து வந்தார்கள்.

- 

இது இப்போதுள்ள சிவகார்த்திகேயன் வரை தொடர்ந்து கொண்டுதான் இருக்கிறது. அந்த வகையில் 60களில் காதல் நாயகனாக அறிமுகமாகி வலம் வந்த ஒரு நடிகர் 1980களில் வில்லனாக மிரட்டினார். அவர்தான் 'கலை செல்வம்' என அழைக்கப்படும் நடிகர் ரவிச்சந்திரன்.

தமிழ்நாட்டில் கரூர் மாவட்டம் வாங்கல் பகுதியை பூர்வீகமாகக் கொண்ட ஸ்ரீநிவாசன், லட்சுமி தம்பதிக்கு 1942ம் ஆண்டு மார்ச் 30ல் பிறந்தார் ரவிச்சந்திரன். இவரின் தந்தை ஸ்ரீநிவாசன் மலேசியாவில் இயங்கி வந்த தமிழ் நேசன் பத்திரிகையின் ஆசிரியராகப் பணியாற்றினார். அதன்காரணமாகக் குடும்பத்துடன் மலேசியா தலைநகர் கோலாலம்பூருக்குக் குடிபெயர்ந்தனர். அங்குதான் ரவிச்சந்திரன் தனது பள்ளிப் படிப்பை முடித்தார். இவரது இயற்பெயர் பி.எஸ்.ராமன். பின்னாளில் சினிமாவுக்காக ரவிச்சந்திரன் என மாற்றிக்கொண்டார். தனது 8ம் வகுப்பு வரை மலேசியாவில் படித்த ரவிச்சந்திரன் அதன்பிறகு தமிழகத்திற்கு வந்து திருச்சியில் உள்ள தனது அக்கா வீட்டில் தங்கி அங்குள்ள செயின்ட் ஜோசப் கல்லூரியில் இளங்கலைப் பட்டப்படிப்பை முடித்தார். மகனை டாக்டருக்குப் படிக்க வைக்க வேண்டும் என்பது தந்தையின் கனவு. அதற்காக சென்னைக்கு வந்த ரவிச்சந்திரனுக்கு சினிமா அசையும் கூடவே வந்தது.