Menter gymdeithasol yn ehangu gwasanaethau achub bywydau gyda grant o £500,000

BYDD menter gymdeithasol sy'n tyfu yn darparu cymorth hanfodol i bobl yng Nghorwen a Llangollen yn ehangu ar ôl sicrhau £500,000 o gyllid.

- 

Bydd y grant gan gronfa’r Loteri Genedlaethol - Pobl a Lleoedd yn galluogi Partneriaeth Gymunedol De Sir Ddinbych (SDCP) i greu dwy swydd newydd ac ymestyn gwasanaethau gyda’r nos a thros benwythnosau yn ogystal â dyddiau’r wythnos.

Bydd y chwistrelliad o arian hefyd yn sicrhau dyfodol y cwmni di-elw am y pedair blynedd nesaf, yn ôl y ferch newydd wrth y llyw.

Mae Sally Lloyd Davies, o'r Maerdy, sy'n fam i bedwar o blant, wedi’i phenodi’n brif swyddog newydd y sefydliad.

Mae hi’n dilyn yn ôl troed ei rhagflaenydd a’i mentor, Margaret Sutherland, sy'n ymddeol wyth mlynedd ar ôl ei “chyfraniad aruthrol” a gafodd ei gydnabod gydag MBE yn 2020.

Sefydlwyd y Bartneriaeth Gymunedol yn 2011, gyda’r ddwy ohonynt yn dechrau gweithio yno ar yr un diwrnod bum mlynedd yn ddiweddarach ac ers hynny mae wedi mynd o nerth i nerth.

Yn ogystal â rheoli dwy ganolfan gymunedol, Canolfan Ni yng Nghorwen a Hwb Cymunedol Pengwern yn Llangollen, mae Partneriaeth Gymunedol De Sir Ddinbych yn darparu cyfres o wasanaethau sydd wedi’u cynllunio i “wella iechyd a lles” pobl hŷn a bregus yn bennaf yn Nyffryn Dyfrdwy.

Maent yn cynnwys prydau ar olwynion gyda 1,500 o ddanfoniadau bob blwyddyn yn Edeyrnion, clybiau cinio sy'n gweini 2,000 o brydau bob blwyddyn, gweithgareddau cymdeithasol ac ystod o wasanaethau cludiant cymunedol sy’n gwneud cyfanswm o bron i 7,000 o deithiau dros y 12 mis diwethaf.