Cerdyn yn gymorth i leoliadau i ddeall anghenion yr anabl

Mae Gracie Mellalieu, 18 oed, yn hyrwyddo'r cynllun arloesol fydd yn cael ei lansio yng ngogledd Cymru ddiwedd y mis gan fenter gymdeithasol PIWS, a sefydlwyd er mwyn ymgyrchu i wella mynediad i blant a phobl ifanc ag anableddau mewn gwahanol leoliadau.

- 

Heddlu Gogledd Cymru yw'r llu cyntaf yn y DU i fabwysiadu'r cerdyn, er bod gan heddluoedd eraill yng Nghymru a Lloegr ddiddordeb mewn cofrestru i'w ddefnyddio hefyd.

Mae'r cerdyn dwyieithog yn cynnwys hyd at naw symbol sy'n crynhoi gofynion mynediad y person anabl, gyda phob un yn seiliedig ar eu hawliau o dan y Ddeddf Cydraddoldeb.

Mae'n rhoi gwybod i leoliadau "yn gyflym ac yn ddiffwdan" am yr addasiadau rhesymol sydd eu hangen ar y person anabl, fel nad oes rhaid iddynt fynd i fanylion hir am eu gofynion o ran cael mynediad hwylus.

Mae Gracie, sy'n byw ym Mynydd Isa, ger yr Wyddgrug, yn un o ddim ond 3,000 o bobl ar draws y byd sydd â syndrom Morquio.

Mae'n gyflwr lle nad yw'r corff yn cynhyrchu digon o ensymau i dorri lawr y deunyddiau na all y corff eu defnyddio, ac mae'n effeithio ar bopeth gan gynnwys ei symudedd.

Bob wythnos mae'n cymryd trwythiad o ensym a wnaed yn arbennig ar ei chyfer, a thros y blynyddoedd mae wedi cael 11 llawdriniaeth i ddelio ag amrywiaeth o broblemau, gan gynnwys sythu ei trachea.