தேர்தல் வாக்குறுதிப் படி நெல் விலை நிர்ணயம்

விவசாயத் தொழில் மேலோங்க வேண்டுமென்றால், இடுபொருள் விலை குறையவேண்டும், விளைபொருள் விலை கூட வேண்டும். இரசாயனமயமாகிப்போன உரம், பூச்சி மருந்து போன்ற இடுபொருட்கள் விலை இஷ்டத்துக்கு ஏறுகிறது. ஆனால், விளைவிக்கும் தானியங்கள், காய்கறிகள் விலை சீசனுக்கு சீசன் குறைகிறது. இதனால் வேளாண்மை தொழிலை விட்டுவிட்டு ஏராளமானோர் வெளியேறிவிட்டனர்.

- 

இந்நிலையில், தமிழ்நாட்டின் முதன்மை உணவு தானியமான நெல்லின் விலையை முதல்வர் ஸ்டாலின் கணிசமாக ஏற்றி அறிவித்துள்ளது உழவர்கள் கவனத்தை ஈர்த்துள்ளது. நான்கு நாட்களுக்கு முன்பு சேலம் மாவட்டத்திற்கு வருகை தந்த முதல்வர் மு.க. ஸ்டாலின், காவிரி டெல்டா பாசனத்திற்கு மேட்டூர் அணையில் இருந்து தண்ணீரைத் திறந்துவிட்டதோடு, நெல் உற்பத்திக்கு முன் பாய்ச்சலாக நெல் விலை உயர்வையும் அறிவித்தார்.

"விவசாயிகள் இனி ஒரு குவிண்டாலுக்கு ரூ. 2,500 பெறுவார்கள் "சாதாரண ரக நெல், குவிண்டாலுக்கு ரூ. 2,500-க்கும் சன்னரக நெல், குவிண்டாலுக்கு 2548-க்கும் கொள்முதல் செய்யப்படும். இதனால் 10 லட்சத்துக்கு அதிகமான விவசாயிகள் பயன்பெறுவார்கள்" என அவர் தெரிவித்தார்.

கடந்த ஆட்சிக்காலத்தில் நெல் ஆதார விலையாக ரூ.1960 மட்டுமே வழங்கினர். 2021ஆம் ஆண்டு தேர்தல் வாக்குறுதியாக, ஆட்சிபொறுப்பேற்றவுடன். நெல் விலை ரூ 2500 ஆக உயர்த்தி கொடுக்கப்படும் என அறிவிக்கப்பட்டது. சற்று தாமதம் தான் என்றாலும் கொடுத்த வாக்கு காப்பாற்றப்பட்டுள்ளது.